Германската економија, која сè уште закрепнува од зимската рецесија, влијае и врз македонските извозници, кои овој период се соочуваат со намален број нарачки за германскиот пазар.
Околу 70 отсто од текстилното производство завршува во Германија, вели во интервју за „Блумберг Адрија“ Маријана Перковска, претседателка на текстилниот кластер.
„Нашата текстилна индустрија во голема мера особено е поврзана со случувањата во Германија, така што не е само инфлацијата еден од факторите што влијаеја негативно на текстилната индустрија туку и намалувањето на потрошувачката во Германија. Знаете дека ние произведуваме финален производ, а широката потрошувачка имаше пад во Германија и тоа се одрази на нашите нарачки. Друг фактор е тоа што инфлацијата на домашниот пазар не ги следи приливите или приходите што можат да се остварат во Македонија, затоа што ние имаме фиксен курс на еврото, а и зголемувањето на платите, особено на минималната плата, за која постојано зборуваме дека треба да биде следено од зголемувањето на продуктивноста, односно треба да биде економска, а не социјална категорија, сето тоа придонесе голем некои од текстилните компании да имаат финансиски проблеми и да се борат да ги сервисираат сите процеси и трошоци во процесот на производство“, вели таа.
Заедно со другите проблеми, како инфлацијата, скапите кредити, дефицитот од работници, ниската продуктивност и конкурентност, текстилците се доведени во позиција да се борат за опстанок.
Според Петровска, друг дел од фирмите својот капитал го инвестира во други сектори.
„Некои од компаниите лани ставија клуч на врата. Производството не е веќе привлечно за луѓето да сакаат да работат во оваа индустрија. Но не станува веќе збор само за пристап до финансиски средства туку едноставно не се гледа перспектива во овој сектор. Голем дел сопственици на текстилни компании го пренасочуваат својот капитал во други индустрии, најчесто хотелиерство и угостителство, каде што наоѓаат поголем интерес“, вели таа.
Перковска потенцира дека текстилот има долга историја во Македонија и некогаш бил носечка индустриска гранка, но со години веќе зборуваме како изумира.
Државата потфрла, децидна е претседателката на текстилниот кластер.
„Ова не се проблеми од вчера, ние за проблемите на текстилците зборуваме со години. Но наидовме на незаинтересираност од страна на релевантните фактори за оваа индустрија да преживее. Текстилната индустрија, за жал, воопшто не е поддржана ниту од државата ниту од банките. Потребно е зголемување на продуктивноста и конкурентноста на странските пазари. Потребна е модернизација, автоматизација, а за тоа се потребни пари. А сите знаеме колку се поскапени кредитите и банките не можат да ги следат потребите на компаниите, а ниту државата прави некакви напори да го амортизира тоа“, вели Перковска.