Цените на производите ќе продолжат да растат, но со намалена динамика во наредниот период. Вакви се очекувањата на дел од трговците. Петар Денковски, генерален директор на синџирот маркети „Веро“, во разговор за Блумберг Адрија ТВ вели дека не се многу оптимисти кога станува збор за цените.
„Нашите очекувања не се премногу оптимистички. Веруваме дека цените ќе продолжат да се зголемуваат и понатаму, но не со ова темпо како што беше досега, и ќе се стави под контрола, но нема да се елиминира растот на цените“, вели Денковски.
Статистичките податоци покажуваат мал пад на трговијата на мало, најмногу поради падот на продажбата на прехранбените производи.
„Резултатите не се охрабрувачки и покажуваат, како во регионот, така и во нашата држава, дека има пад, но тоа не нѐ охрабрува многу и нѐ тера да работиме во правец да ги промениме работите“, вели директорот на „Веро“.
Според него, падот на трговијата на мало е резултат на намалената куповна моќ на населението.
„Според нашите анализи, за тоа има повеќе причини. Најголемата причина за падот на куповната моќ е зголемувањето на цените на производите, поради што домаќинствата поинаку го планираат семејниот буџет. Исто така, влијание имаат и платите во реалниот сектор, кои не се зголемуваат и не ја следат стапката на инфлација. Секако, не треба да го изоставиме и психолошкиот момент во услови на криза, кога потрошувачите се загрижени за иднината и тие сѐ помалку и помалку трошат, или штедат за некои потешки времиња“, вели Петар Денковски.
Според Денковски, потрошувачите претежно се ориентираат на основните намирници, или производи што се на акција, каде што можат за помалку пари да добијат повеќе производи. Тој не смета дека владината мерка за ограничување на маржите ги донесе посакуваните резултати.
Целиот разговор погледнете го во видеото.
.webp){kind=icon}
