text size
Истражувањата и анализите покажуваат дека продуктивноста на малите и средните претпријатија од Македонија е помала во споредба со европската. Според Даниела Михајловска-Василевска од Стопанската комора на Македонија (СКМ), тоа се должи на структурата на самите претпријатија, но и на различните критериуми што ги класифицираат фирмите.
„Од една страна, поголемиот дел мали и средни претпријатија во Европа работат во сектори со поголема иновативност, со поголема продуктивност и поголема технолошка интензивност, а од друга страна и нивото на човечки капитал и знаење на работниците е повисоко од тоа кај нас“, вели Даниела Михајловска-Василевска од СКМ, која гостуваше на Блумберг Адрија ТВ.
Таа вели дека од околу 800.000 вработени, дури 120.000 работат во примарното земјоделство, а најголем број се претпријатија во трговијата и угостителството, дејности со помала продуктивност.
„Различни се и некои од критериумите за класификација на претпријатијата. Средните фирми кај нас се до 10 милиони евра обрт, а во ЕУ се до 50 милиони евра и тоа прави голема разлика во пресметката на продуктивноста“, вели Михајловска-Василевска, која во разговорот детално опишува што сè влегува во продуктивноста на претпријатијата.
Таа потенцира и дека европските фирми имаат повеќе извори за финансирање на нивните проекти, што нуди поголем развој.
Погледнете го видеото со целиот разговор со Даниела Михајловска-Василевска од СКМ, која за „Блумберг Адрија“ зборува за анализите на Стопанската комора, како и за нивните заложби за поддршка на извозните компании и за креирање подобро платени работни места, со поголема додадена вредност, што на крајот води и до поголема продуктивност.
.webp){kind=icon}
