.webp){kind=icon}
Многу важна порака е тоа што самитот ЕУ - Западен Балкан се одржува во регионот каде што се, на некој начин, главните корисници на овој процес, посочи во разговорот за „Блумберг Адрија ТВ“, Татјана Штерјова Душковска, генерална секретарка на Коморскиот инвестициски форум за Западен Балкан 6 (КИФ ЗБ6).
„Добра вест е што изминатиот период економската агенда, односно онаа почетна идеја за воспоставување простор каде што ќе се применуваат четирите слободи на ЕУ и во регионот на Западен Балкан, повторно добива приоритет и се искачува на листата на важните прашања за развојот на регионот“, нагласува Душковска.
Како што посочи таа, иницијативата за зелените коридори, односно доказот колку позитивно може да влијаат на олеснувањето на протокот на стоки и услуги низ регионот, се проширува и е имплементирана во една од поставените активности на акцискиот план за заедничкиот регионален пазар.
„Сега се предвидува нејзино проширување на граничните премини кон некоја од членките на ЕУ. Важно е да се напомене дека се очекува неделава да биде потпишан договор помеѓу хрватските царински власти и трите земји од Западен Балкан што имаат директни граници со Хрватска што е многу важно од аспект на трговската размена“, истакна Душковска.
Таа во гостувањето нагласи дека во најновиот извештај на КИФ ЗБ6, кој ќе биде презентиран утре, се сумирани главните препораки и забелешки на бизнис-заедницата за тоа кои се клучните прашања за кои треба поинтензивно да се работи за да има подобра реализација на акцискиот план.
Целиот разговор со Татјана Штерјова Душковска погледнете го на видеото во рамките на оваа објава.
