Дури третина од најголемите должници во земјава се здравствени установи. Во согласност со листата што квартално ја објавува Министерството за финансии, а во која се вклучени јавни и државни установи, заклучно со септември годинава од 30 најголеми должници, десет се од областа на здравството. Нивниот долг до третиот квартал годинава надминувал 68,5 милиони евра.
На високото трето место на целосната листа со должници се јавува правното лице Јавна установа од областа на здравството за потребите на јавните здравствени установи, универзитетски клиники, завод и ургентен центар. Оваа установа, позната уште како заеднички служби на Клиничкиот центар, должи 15,5 милиони евра. И сметката ѝ е блокирана.
Од долгот, најголем дел е за струја. Клиничкиот центар и ГОБ „8 Септември“ беа на листата за исклучување од системот за снабдување со електрична енергија, но државата одлучи да го покрие долгот со седум милиони евра.
Прочитај повеќе
Како се зголемуваа парите за здравството, а системот колабираше?
Здравствените буџети растат секоја година, а пари недостигаат сè повеќе.
06.12.2022
Државата се вмеша откако ЕВН соопшти дека Клиничкиот центар ги исполни сите услови за исклучување на струјата. затоа што веќе биле искористени сите законски можности за наплата на долгот.
„Даден им е рок од две недели, во кои треба да достават банкарска гаранција, а веднаш потоа може да бидат исклучени. За состојбата се известени сите институции и Владата“, велат од компанијата снабдувач со струја.
„Блумберг Адрија“ анализираше како долгот на заедничката служба стигна до 15,5 милиони евра. Констатиравме дека на листата од над 1.000 должници на Министерството за финансии, лани во декември овој правен субјект - го нема. Се појавува во мартовскиот извештај со достасан а неплатен долг од 14 милиони евра, до септември тој долг надминува 15,5 милиони евра.
Заедничката служба на Клиничкиот центар, формирана за да се занимава со сметките за режиски трошоци на клиниките, како и со дел од набавките на материјали за нив, накалеми милионски долгови, а притоа од листата на должници не исчезнаа другите клиники. Напротив, нивните долгови исто така постојано растат, а од топ 10 најголеми должници во здравството, половината се државни клиники.
Ниту болниците надвор од Клиничкиот центар, но и во другите градови не се имуни на задолжувањето. Градската општа болница „8 Септември“ во септември имала неплатен долг од 5,7 милиони евра. Во топ 10 најголеми должници во здравството влегува и кичевската болница, која го држи високото шесто место на листата на најголеми должници во државата (должи над 11,3 милиони евра), па следуваат охридската и кумановската болница.
Долговите во здравството растат паралелно со растот на државниот буџет за здравство. Годинава овој сектор е еден од ретките што со ребалансот добија повеќе пари и на располагање има над 15 отсто од вкупните буџетски средства во државава. За следната година буџетот за здравство е проектиран на над 685 милиони евра или над 12 отсто од вкупниот буџет на државата.
.webp){kind=icon}
