Европската банка за обнова и развој (ЕБОР) и ПроКредит Банка продолжуваат во промовирање на енергетската ефикасност во Македонија со дополнителни средства достапни за домаќинствата, наменети за заштеда на енергијата.
ЕБОР одобри кредит во износ од ЕУР 1,5 милиони за ПроКредит, со кој се овозможуваат средства за инвестиции во енергетска ефикасност.
Финансирањето е обезбедено под Програмата за финансирање на зелена економија (Green Economy Financing Facility – GEFF) за Западен Балкан, со која се поддржуваат енергетски ефикасни решенија за изградба на позелена и поодржлива економија.
Новиот кредит за ПроКредит го обележува почетокот на третата фаза од ГЕФФ Програмата за Западен Балкан, која до сега им има помогнато на над 14.000 домаќинства во регионот со кредит во износ од ЕУР 75 милиони во мерки за подобрување на енергетската ефикасност.
,,Ни претставува задоволство да соработуваме по трет пат со ПроКредит Банка во рамките на ГЕФФ програмата. Поволното финансирање ќе биде достапно преку ГЕФФ кредитната линија за домаќинствата во Македонија за инвестиции во енергетска ефикасност. Овие инвестиции ќе им овозможат да го подобрат комфорот на домаќинствата, но и ќе им ги намали сметките за потрошена електрична енергија.’’ , изјави Анди Аранитаси, претставник на ЕБОР.
Стевче Кузмановски, член на Управниот одбор на ПроКредит најави дека ќе се пласираат кредити за инвестиции во фотоволтаици, системи за ладење и греење, топлински пумпи, прозорци и врати, внатрешна и надворешна изолација.
„Главен бенефит за клиентите е грант или поврат на направените инвестиции до 20 проценти. Ова претставува дел од нашите заложби за градење одржлива и ,,зелена иднина” и е во рамките на корпоративната филозофија на ПроКредит Банка за посветеноста на промоција на еко-инвестиции кои ќе направат вистински импакт во општеството “, изјави Кузмановски.
.webp){kind=icon}
