Среќна нова 2023 година!
Ако 2020 и 2021 година беа запаметени по пандемијата од коронавирусот, 2022 дефинитивно ќе остане во нашите сеќавања по енормните поскапувања и рекордната инфлација. Увозната зависност на Македонија, пред се за прехранбени производи уште еднаш се покажа како еден од најголемите проблеми на домашната економија. 2022 година не‘ научи дека без зголемување на домашното производство на основните ресурси, нашата земја и во иднина ќе биде подложна на увезени економски шокови.
Слична е приказната и со енергијата. Со години наназад Македонија нема инвестиции во нови енергетски капацитети и тоа сега скапо го плаќаат граѓаните и македонските компании кои се принудени да купуваат струја од странство по економски неиздржливи цени.
Кога е во прашање човечкиот капитал, резултатите од пописот ни покажаа дека изминативе дваесет години Македонија има загубено над 200.000 работоспособни граѓани. Ако се земе предвид лошата демографска слика во земјава односно континуираното иселување и стареењето на населението јасно е дека во блиска иднина ќе имаме многу посериозен недостиг од работници отколку сега. Буквално, ќе нема кој да работи.
Затоа носителите на политиките мора да ги засукаат ракавите и уште на почетокот на 2023 година активно да работат на поттикнување на домашното производство на храна, да обезбедат пари за сериозни инвестиции во енергетскиот сектор и да ги поттикнат младите да останат во земјава.
Доколку има квалитетни решенија за овие три прашања ќе се создаде основа за стабилна економија со перспектива за развој.
Во надеж за повеќе работа и во поубави моменти, почнуваме сега!
.webp){kind=icon}
Во моментов нема коментари за веста. Биди прв да коментира...