Компаниите од прехранбената индустрија што користат повластена цена на струјата и кои не ги намалиле цените согласно договореното со Владата, ќе ја изгубат оваа поволност, најави денеска министерот за економија, Крешник Бектеши.
Тоа ќе се знае на крајот на месецот согласно податоците од Државниот пазарен инспекторат (ДПИ). Оние што ги намалиле цените ќе продолжат да ја користат мерката.
„На дневна база разговараме со стопанските комори и со одредени сектори од индустријата, особено производителите на домашни прехранбени производи. Во случај ако нема дополнително намалување ќе се доведеме во ситуација тоа да се укине како поддршка од страна на Владата, затоа што целта на поддршката беше да се влијае во делот на намалувањето на цените на основните прехранбени производи. Ако не се намалат на процентот што е договорен помеѓу компаниите и Владата, и согласно очекувањата на потрошувачите, подобро тие средства да ги дадеме на граѓаните преку различни мерки“, рече Бектеши на средба со новинарите.
Посочувајќи дека намалувањето би требало да се движи од седум до 13 отсто, министерот потенцираше дека одредени компании ги намалиле цените, но за жал одредени не.
.webp){kind=icon}
