Пекарите во текот на денот треба да го соопштат својот став по синоќешната владина одлука за определување обврска на трговците да набавуваат и продаваат определени видови и количества на одделни стоки на потрошувачите според определен редослед, со која производителите на леб се обврзуваат да го произведуваат и да го ставаат во промет лебот со замрзната цена, во количество од најмалку 80 отсто од производството во декември 2022 година.
Владината одлука вчера на социјалните мрежи ја сподели министерот за економија Крешник Бектеши, а меѓу другото со неа се предвидува и обврска за трговците на мало што продаваат леб во структурата на дневната набавка на сите видови леб да имаат најмалку 80 отсто од лебот со замрзнатата цена.
„Денеска во Стопанската комора ќе има прес-конференција на која ќе го соопштиме ставот“, изјавиле за МИА претставници од пекарската индустрија.
Вчера пекарите беа категорични дека останува во сила нивната одлука од понеделникот, да не испорачуваат бел и полубел леб во продавниците.
Владата во вторникот донесе одлука да се замрзне цената на белиот и полубелиот леб од 450 грама на 33 денари. Причината за оваа мерка, како што објаснија премиерот Димитар Ковачевски и министрите за економија и за земјоделство, Крешник Бектеши и Љупчо Николовски, е неисполнувањето на договореното од страна на компаниите по испораката на субвенционираната струја, како и заштита на „џебот“ на граѓаните.
.webp){kind=icon}
