Инфлација од 16,7 проценти во февруари: Храната и натаму поскапува

Стапката на инфлација во Македонија во февруари изнесува 16,7 проценти, што е благо намалување во однос на претходниот месец кога изнесуваше 17,1 проценти, покажуваат новите податоци на Државниот завод за статистика(ДЗС).  Цените на мало бележат зголемување од 12,4 проценти во февруари, а забележлив е пораст на цените кај повеќе основни прехранбени производи.

„Пораст на индексите на трошоците на животот во февруари 2023 година, во споредба со претходниот месец, е забележан кај пивото за 5,8 проценти, свежиот и разладениот зеленчук, освен компирите и другите коренести плодови за 4,9 проценти, кафето, чајот, какаото за 2,3 проценти, жестоките пијалаци за 1,4 проценти, прехранбените производи, неспоменати на друго место за 1,3 проценти, лебот и житата за 1,2 проценти, минералната вода, газираните пијалаци, соковите од овошје и зеленчук за 1 процент, шеќерот, џемот, медот, чоколадата и кондиторските производи, виното за 0,9 проценти и месото за 0,7 проценти“, информираат од ДЗС.

Всушност, кога станува збор за храната намалување на цените единствено е забележано кај маслото и маснотиите за 1,1 проценти, свежото и разладеното овошје за 0,8 проценти, млекото за 0,4 проценти, рибата и морските плодови за 0,2 проценти.

„Блумберг Адрија“ во неколку наврати пишуваше дека високата двоцифрена инфлација ќе се задржи и во текот на следните месеци, а позначително забавување би можело да има во втората половина од 2023 година.