Инспекторите ќе бидат на терен и ќе вршат контроли за да се утврди дали трговците постапиле во согласност со одлуките на Владата за намалување на цените на тестенините и млечните производи, кои од утре веќе и официјално стапуваат во сила, велат од Државниот пазарен инспекторат (ДПИ) и посочуваат дека трговците досега требаше да ги усогласат цените според одлуките на Владата, информира МИА.
ДПИ најавува дека инспекторите ќе постапуваат во рамките на своите надлежности што произлегуваат од одлуките, а во согласност со тоа и според Законот за трговија.
„Станува збор за искусни професионалци, со долгогодишно работно искуство во сферата на пазарната инспекција, што значи дека сме апсолутно подготвени да се соочиме и со овој предизвик“, истакнуваат од ДПИ.
Оттаму прецизираат дека контролите ќе се вршат над производите што ги опфаќаат одлуките за определување највисоки цени за одделни производи во трговијата на мало („Службен весник на РСМ“ бр. 52/2023), односно: тестенини неварени, неполнети ниту поинаку приготвени, што не содржат обично пченично брашно или гриз, без додаток на јајца (макарони и шпагети), чија највисока цена на овие производи од ставот се утврдува на нивото на цените што се применувале на 1 март 2023 година, во трговијата на мало, и се намалуваат за 15 проценти, трајно кравјо млеко со масленост од 2,8, 3,2 и 3,5 проценти, потоа урда, кравјo бело сирење и мешано бело сирење, кравји кашкавал (со исклучок на кравји кашкавал без додатоци и пармезан), кисело млеко, павлака и јогурт, без додатоци. Највисоките цени на овие млечни производи се утврдуваат на нивото на цените што се применувале на 1 март годинава во трговијата на мало и се намалуваат за 10 проценти.
Начинот на кој ќе се постапува доколку некој од економските оператори дејствува спротивно на одлуките е предвиден во Законот за трговија. Во случај да се утврди прекршување на одлуките, како што велат од ДПИ, ќе следуваат казни што произлегуваат од тој закон. Казните се високи и изнесуваат од 800 до 10.000 евра, во зависност од големината и видот на економскиот оператор.
„Напоменуваме дека Државниот пазарен инспекторат ќе постапува исклучиво по однос на контрола на цените утврдени со одлуките, но нема надлежност да постапува, ниту, пак, да влијае врз формирање цени во трговијата на големо и трговијата на мало. Апелираме да се почитуваат одлуките, а исто така ги повикуваме граѓаните доколку забележат неправилности, веднаш да пријават во Пазарниот инспекторат. Работиме во интерес на граѓаните и токму затоа се донесени овие одлуки, за да се помогне за време на економската криза, која сè уште постои, и да се спречат личното профитерство и злоупотреба“, велат од ДПИ.
.webp){kind=icon}
