Компанија чија основна дејност била поврзана со долна облека ќе врши надзор на можеби најскапиот инфраструктурен проект во земјава – изградбата на автопатиштата по должината на коридорите 8 и 10Д. Домашните компании бараат дел од колачот на „Бехтел и Енка“, а дали ќе добијат ќе се знае по средбата со премиерот. Ова беше главната вест што ја потресе земјата неделава.
И глобално, таа тргна со силен потрес. Пропадна американската банка „Силикон валеј“ (СВБ). Првиот афтершок од овој земјотрес на европско тло се почувствува во Швајцарија. Кај нас не се очекува влијание.
Во ек на инфлациска криза и монетарно затегнување, пропаѓањето на банката е нов елемент за кој грижи ќе имаат и Европската централна банка и Федералните резерви на САД. Се прогнозира дека ако состојбата ескалира, централните банки ќе треба уште посилно од сега да ги зголемуваат каматите.
Аналитичарите на „Блумберг Адрија“ прогнозираат дека за зауздување на високата инфлација, НБРМ ќе ја дигне референтната камата од сегашните 5,25 до шест отсто во наредниот период. А тоа ќе го продолжи сегашниот тренд, во кој банките се сè попретпазливи, клиентите сè повоздржани. Анализиравме и што е поисплатливо за инвестирање во вакви услови - обврзници или „класично“ штедење.
За тие што немаат што да штедат, Владата гарантира зголемување на минималната плата за 2.175 денари. И пониски цени за шпагетите, млекото и лебот, како дел од најновиот пакет замрзнувања на цените на храната.
Неделава анализиравме и кои се новите правила по кои работат германските компании во земјава, но и каква е стартап-климата во земјава. Повторно се занимаваме и со недвижностите, но овој пат ги баравме Македонците што градат во странство и тие што во услови на највисоки цени бараат алтернативи во земјава.
Безбедноста на интернет е уште една тема што неделава ја разработи тимот на „Блумберг Адрија“. Откривме дека додека некои земји го забрануваат Тикток, кај нас нема ни закон за приватноста, а злоупотреби има – најмногу на Фејсбук и Инстаграм.
.webp){kind=icon}
