.webp){kind=icon}
Минималната плата, која досега изнесуваше 18.000 денари, од следниот месец ќе биде повисока за 2.175 денари и ќе изнесува 20.175 денари. Во согласност со Законот за административни службеници, како што најави денеска премиерот Димитар Ковачевски, ќе се изврши усогласување и на платите на 27.000 службеници.
„Од април минималната плата ќе биде повисока за 2.175 денари и ќе изнесува 20.175 денари. Тоа значи дека над 12 проценти имаме зголемување на основната, минимална плата. Во согласност со Законот за административни службеници, ќе се усогласат преостанатите плати за 27.000 службеници“, изјави Ковачевски по седницата на Економско-социјалниот совет (ЕСС), информира МИА.
Зголемувањето на минималната плата е направено во согласност со новата методологија за усогласување донесена во 2022 година, по преговорите меѓу Владата, синдикатите и работодавците. Во согласност со новата методологија, минималната плата се усогласува со 50 отсто од трошоците за живот и 50 отсто со растот на просечната плата.
„Минималната плата во 2023 година порасна за 12,55 проценти. Ова значи дека во државата со исплатата на мартовската плата нема да има пониска плата од 20.175 денари“, изјави министерката за труд и социјална политика Јованка Тренчевска.
За вицепремиерот за економски прашања Фатмир Битиќи, денешното зголемување на минималната плата е показател како преку системско решение и дијалог се утврдува минималната плата.
„Граѓаните ќе добијат за 2.175 денари повисока минимална плата со мартовската исплата на платата. Денеска на ЕСС, каде што преку дијалог со синдикатите и работодавците во 2022 година се договоривме за системско решение и нова методологија за постојан раст на минималната плата, ја утврдиме сегашната минимална плата“, изјави Битиќи.
Од Сојузот на синдикати на Македонија (ССМ) ги повикаа работодавците да ги усогласат другите плати со висината на минималната плата за да не дојде до уравниловка.
„Сакаме да ги повикаме работодавците и во приватниот и во јавниот сектор да најдат сили и начин да ги усогласат платите и на преостанатите вработени, за да не дојде до уравниловка, каде што нема да имаме силно мотивирани работници, туку ќе имаме работници што ќе се споредуваат едни со други за тоа колку плата земаат“, изјави Златко Цветковски од ССМ.
Од Организацијата на работодавците на Македонија (ОРМ) изјавија дека поддржуваат системски решенија и дека секогаш се за тоа да се мотивираат и наградуваат добрите работници.
„Ги поддржуваме добрите, продуктивните работници и се стремиме нашите вработени да имаат добра куповна моќ. Ова законско решение е веќе стокмено и нема потреба да разговараме понатаму за негови измени, меѓутоа мора да разговараме во една друга насока, а тоа е да имаме попродуктивни работници, да имаме млади луѓе што ќе бидат задоволни и млади луѓе што ќе сакаат да работат во приватниот сектор“, рече Владанка Трајковска, претседателка на ОРМ.
