.webp){kind=icon}
Во првиот квартал од 2023 година извозот од индустриските зони достигна 951,6 милион евра, што е највисоко ниво досега во последниве пет години. Анализата на ТИРЗ покажува дека тоа е пораст од речиси 12 проценти во однос на истиот период лани и над 22 отсто во однос на 2021 година.
Во март вкупниот извоз од зоните достигна 345 милиони евра, што е за 31 отсто повеќе споредено со март 2022.
„И во однос на увозот е регистрирано највисоко ниво досега во однос на споредбата по квартали во изминативе пет години. Така, увозот во првиот квартал од годинава достигна 770 милиони евра и е за 3,5 проценти повисок од првиот квартал лани, а за речиси пет отсто повисок споредено со првиот квартал во 2021 година. Во зоните во март месечниот увоз во ТИРЗ е на ниво од 279 милиони, што е за 17 отсто повеќе во однос на март лани. Анализата покажува дека во третиот месец годинава е регистрирано и високо ниво на нето-извозот од 23,4 проценти“, информираат од ТИРЗ.
Анализата, како што се наведува во соопштението од ТИРЗ, покажува и дека продолжува растот на бројот на вработени, кој во март достигна највисоко ниво досега. Во компаниите во ТИРЗ работат 16.650 лица, што е за речиси 15 проценти повеќе во однос на истиот период лани. Само во почетокот на годинава има над 260 нови вработени во компаниите во ТИРЗ.
„Се очекува трендот на раст да продолжи со оглед на тоа што ТИРЗ во последниве две години постигна договори во вкупен обем од над 620 милиони евра и тие треба да донесат над 5.000 нови работни места“, информираат од дирекција за ТИРЗ.
