.webp){kind=icon}
Бројот на вработени во Технолошко-индустриските развојни зони (ТИРЗ) во април повторно бележи раст и достигна 16.700 лица. Тоа е за 15 проценти повеќе од април 2022 година, покажува редовната месечна анализа на Дирекцијата на ТИРЗ. Оттаму информираа дека само од почетокот на годинава во компаниите во зоните се вработени речиси 500 луѓе.
„Продолжува и растот на извозот, кој заклучно со април достигна 1.230 милијарди евра. Само во април компаниите во ТИРЗ реализирале извоз од 277 милиони евра, што е раст од 12 проценти споредено со април минатата година. И увозот во првите четири месеци од годинава достигна над една милијарда евра. Вкупно 250 милиони евра увоз оствариле компаниите во ТИРЗ само во април, што е на исто рамниште со април 2022 година“, појаснуваат од ТИРЗ.
Поради ваквите економски движења, како што наведуваат, продолжува и позитивниот тренд на раст кај нето-извозот, кој заклучно со април е 20,5 проценти.
Инаку, годишната анализа на ТИРЗ покажала дека компаниите во зоните уплатиле 35 проценти повеќе средства во буџетот на државата во 2022 година споредено со 2021 година. Односно, според пресметките на Дирекцијата на ТИРЗ, за едно евро исплатено од државата компаниите враќаат назад во буџетот најмалку четири евра.
Податоците во анализата направена врз база на завршните сметки од компаниите покажуваат и дека тие оствариле ниво на нето-добивка за 10 проценти повисоко споредено со претходната година. Корисниците на ТИРЗ регистрираат пораст на нето-платата од најмалку 13 проценти во однос на 2022 година, што е повисоко и од растот на нето-платата во националната економија.
