Доаѓа ли полека времето кога криптовалутите ќе станат „мејнстрим“ средство за плаќање и инвестиции е прашање за кое позитивниот одговор станува поизвесен ако се земе предвид дека републиканските конзервативци ја прекинаа дводневната блокада на криптозаконите отворајќи го патот за гласање во Претставничкиот дом за серијата мерки кои треба да донесат огромни либерални промени на криптопазарот, а кои се поддржани од администрацијата на претседателот Доналд Трамп.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Кој во Македонија и во регионот купува имоти со криптовалути
Кога Ласло Хањеч плати 10.000 биткоини за две семејни пици во 2010 година, тој ниту сонуваше дека создава еден вид пресвртница во светот на криптовалутите. За преминот од нарачување пица до купување луксузни вили со криптовалути не требаше многу време, а регионот Адрија има голем потенцијал да стане дел од таа функционалност.
Во Македонија, виртуелните валути немаат правен статус на пари или валута, а тоа е исто така и во Србија. Сепак, ова не значи дека, барем теоретски, услугата или производот не би можел индиректно да се плати со овој вид дигитален имот во иднина. Истражувавме во кои земји од регионот криптовалутите веќе наголемо се користат за купување недвижнини.
Навалија и Балканци: Колку чинат становите во Дубаи и Абу Даби?
Дубаи, бисерот на Персискиот Залив, одамна престана да биде само луксузна и туристичка дестинација. Денес, тој е позициониран како еден од најатрактивните пазари на недвижности за инвеститори од целиот свет, а ова го потврди за „Блумберг Адрија“ претприемач од Србија кој живее и работи во Обединетите Арапски Емирати (ОАЕ) веќе 10 години. „Пазарот во Дубаи е исклучително привлечен. Очекувам поврат на инвестицијата при купување стан за максимум 14 години“, рече тој.
Стабилната економија на Обединетите Арапски Емирати, даночните олеснувања, либералната политика кон странските сопственици и високите приноси од кирија го направија инвестирањето во недвижности во тој дел од светот синоним за безбедна и профитабилна инвестиција. Сепак, Дубаи се издвојува далеку од другите емирати, со исклучок можеби на Абу Даби, кој има потенцијал да се приближи.
Заработуваат повеќе како инвеститори: Кои се најуспешните спортисти-бизнисмени?
Роџер Федерер со години доминираше на тениските терени, заработувајќи речиси 130 милиони долари од награди на турнири. Но, неговата финансиска приказна надвор од теренот е поимпресивна од кој било трофеј. Федерер докажа дека е еднакво вешт во инвестирањето како што е и на тревата на Вимблдон.
Најважниот потег во деловната кариера на Федерер се случи во 2019 година, кога инвестираше околу 54 милиони долари во швајцарската компанија „Он Холдингс АГ“ (On Holding AG), позната по своите иновативни патики за трчање. Федерер доби околу три проценти од сопственоста, а две години подоцна компанијата излезе на берза со проценка од шест милијарди долари.
„Кока-кола“ се враќа на вистински шеќер по барање на Трамп
Претседателот Доналд Трамп на социјалната мрежа Truth Social објави дека компанијата „Кока-кола“ (Coca-Cola) се согласила да користи шеќер од шеќерна трска во своите пијалаци во САД. „Разговарав со 'Кока-кола' за користење ПРАВ ШЕЌЕР од шеќерна трска во соковите во САД, и тие се согласија на тоа“, напиша Трамп. „Сакам да им се заблагодарам на сите одговорни во 'Кока-кола' .“
Компанијата потоа издаде соопштение во кое вели: „Го цениме ентузијазмот на претседателот Трамп за нашиот култен бренд 'Кока-кола' . Наскоро ќе споделиме повеќе детали за новите иновативни производи во рамките на нашето портфолио.“ „Кока-кола“ веќе продава верзија на „мексиканска Кока-Кола“ која содржи шеќер од шеќерна трска.
Шефот на „Енвидија“: Кинеската вештачка интелигенција е светска класа
Извршниот директор на „Енвидија“ (Nvidia), Џенсен Хуанг, ја пофали компанијата „Дипсик“ (DeepSeek) и другите кинески учесници во истражувањата за вештачка интелигенција (ВИ) за време на неговата средба со политички и технолошки лидери во Пекинг. Хуанг изјави дека отворено-достапните кинески модели на ВИ му помагаат на остатокот од светот, за време на разговор до камин со Ванг Џијан, поранешен извршен директор на „Алибаба“ кој помогна во создавањето на одделот за облак на компанијата.
Генералниот директор на „Енвидија“ посебно ја истакна научната работа на „Дипсик“ во областа на вештачката интелигенција. „Неверојатно добро е напишана. Тоа е апсолутно научен труд со оценка A+ и инженеринг со оценка A+,“ рече Хуанг. Тој додаде дека кинеските истражувачи за ВИ се водечки во светот по бројот на објавени научни трудови.
.webp){kind=icon}
Во моментов нема коментари за веста. Биди прв да коментира...