Заработуваат повеќе како инвеститори: Кои се најуспешните спортисти-бизнисмени?

Роџер Федерер со години доминираше на тениските терени, заработувајќи речиси 130 милиони долари од награди на турнири. Но, неговата финансиска приказна надвор од теренот е поимпресивна од кој било трофеј. Федерер докажа дека е еднакво вешт во инвестирањето како што е и на тревата на Вимблдон.

Најважниот потег во деловната кариера на Федерер се случи во 2019 година, кога инвестираше околу 54 милиони долари во швајцарската компанија „Он Холдингс АГ“ (On Holding AG), позната по своите иновативни патики за трчање. Федерер доби околу три проценти од сопственоста, а две години подоцна компанијата излезе на берза со проценка од шест милијарди долари. Денес, пазарната вредност на компанијата порасна на дури 17 милијарди долари, со што инвестицијата на Федерер достигна повеќе од 500 милиони долари.

Неговата инвестиција ѝ даде силен поттик на компанијата, а неговиот личен бренд ѝ помогна да се прошири глобално. За само неколку години, „Он“ стана сериозен конкурент на „Најк“ и „Адидас“ во сегментот на спортски обувки.

НБА ѕвезди кои го освоија Волстрит

Додека Федерер се докажа како инвеститор во спортска опрема, НБА ѕвездите со години се истакнуваат во областите на технолошки стартапи, медиуми и франшизи за брза храна. Леброн Џејмс стана првиот активен НБА играч кој стана милијардер, а клучот за неговото богатство не се само високите плати на теренот, туку и стратешките инвестициски потези. Џејмс рано го препозна потенцијалот на франшизата „Блејз Пица“ (Blaze Pizza) и ја претвори својата почетна инвестиција од милион долари во најмалку 35 милиони долари.

Леброн Џејмс со синот/Bloomberg

Неговата медиумска компанија „СпрингХил“ сега вреди околу 725 милиони долари, а тој поседува и малцински удел во „Фенвеј Спортс Груп“, сопственик на Ливерпул и Бостон Ред Сокс. Способноста на Џејмс да ги забележува пазарните трендови го направи вистински пример за успешен спортист-инвеститор.

Поранешната НБА легенда, Шекил О’Нил, ја заврши својата играчка кариера со проценети 292 милиони долари, но неговата бизнис кариера е многу пати поголема. Преку инвестиции во „Гугл“, „Убер“ и „Ринг“, Шек успеа да го зголеми своето богатство на повеќе од половина милијарда долари. Тој поседува 155 ресторани од франшизата „Фајв Гајс“, а неговиот годишен приход од дивиденди и лиценцирање на неговото име е околу 60 милиони долари.

Кевин Дурант инвестираше во над сто компании преку неговата компанија „Трити фајв венчрс“, особено во „Коинбас“, водечка крипто платформа која имаше проценка на првичната јавна понуда (IPO) од 86 милијарди долари. Стратегијата на Дурант се базира на финтек и спортско-технолошкиот сектор и инвестиции во помалку познати, но исклучително профитабилни проекти. Меџик Џонсон ги претвори своите заработки од НБА од 40 милиони долари во бизнис империја од 1,6 милијарди долари. Тој инвестира во спортски франшизи како што се Лос Анџелес Доџерс и Лос Анџелес ФК, а значителен дел од својот капитал го вложил во фондови за недвижности.

Серена Вилијамс: Тенисерката која ја освојува Силициумската долина

Како и Федерер, Серена Вилијамс докажа дека лесно може да ги пренесе своите тениски вештини во деловната област. Нејзиниот фонд „Серена Венчрс“ управува со капитал од над 110 милиони долари и има удели во 85 компании, од кои многу, како „Импосибл Фудс“ и „Мастерклас“, постигнале статус на еднорог.

Серена инвестира со јасна мисија, дури 78 проценти од инвестициите отидоа во компании предводени од жени или членови на малцински групи, што ѝ дава дополнителна ЕСГ вредност.

Меси и Роналдо се ривали и во бизнисот

Лионел Меси не е успешен само на фудбалскиот терен, туку и на пазарот на недвижности. Неодамна, тој успешно ја листираше својата шпанска компанија „Едифицио Ростовер“ (Edificio Rostower) на берзата со проценка од 223 милиони евра, а во исто време го проширува и синџирот луксузни хотели „МиМ Хотелс“ (MiM Hotels) во Каталонија.

Лионел Меси/Depositphotos

Кристијано Роналдо е познат по своите хотели ЦР7 (CR7), кои ги развива во партнерство со португалската групација „Пестана“ (Pestana). Неговиот удел вреди околу 41 милион долари, а тој дополнително го прошири својот бизнис преку клиники за убавина и здравје.

Каде е клучот за успехот на спортистите-инвеститори

Зошто некои спортисти успеваат како инвеститори, додека други остануваат исклучиво на своите спортски успеси е логично прашање. Примерот на Федерер покажува како раното препознавање на деловна можност може да ги зголеми заработките. Наместо класични договори со големи брендови, спортистите како него избираат аранжмани за акции. Федерер и „Он Ранинг“ (On Running), Серена Вилијамс и инклузивните проекти, или Роналдо и сегментот на луксузен животен стил - сите овие примери покажуваат дека инвестирањето во сектори кои се блиски до нивниот личен бренд е речиси сигурен пат до успех.

Инвестирањето во различни сектори им овозможува на спортистите да одржат стабилност дури и кога некои проекти не успеваат. Шек, Леброн и Меџик Џонсон јасно покажуваат како стратешката диверзификација носи долгорочна стабилност. Спортските успеси на Федерер и другите спортски великани сега добиваат сосема нова димензија преку нивните инвестициски потфати. Нивните приказни не се само инспиративни, туку нудат и јасни лекции за сите оние кои сакаат да ги комбинираат спортските амбиции со деловниот успех.