Ако се проневери еден денар од проектот за изградба на коридорите 8 и 10Д на „Бехтел и Енка“, да скапеме во доживотен затвор, рече првиот вицепремиер и министер за политички систем Артан Груби во месечното обраќање во Стопанската комора на Северна Македонија, на темата „’Бехтел и Енка’ - можности, предизвици и одговорности“.
Тој порача дека не познава ниту еден политичар што ќе си дозволи коруптивни активности во проект што го спроведуваат вакви компании, истакнувајќи дека хајката што се води е само за дневна политика.
Груби информира дека досега не се исплатени средства, а првите, авансно плаќање за почеток на градежни работи, ќе бидат објавени на порталот „Отворени финансии“.
„Измените на Законот за работни односи, кои се дел од пакетот закони за забрзување на реализацијата на проектот, не значат експлоатација на работниците и злоупотреба на нивните права. Не станува збор за 60 часа работа, туку за дополнителни часови со согласност на работниците“, објасни Груби.
Според Груби, во договорот никаде не стои исплата на пенали, а домашните градежни компании ќе имаат голема корист во текот на целиот градежен процес со тоа што над 51 процент од работите ќе бидат од домашни ресурси.
Покрај стопанственици, на настанот присуствуваа и министрите за транспорт и врски Благој Бочварски, за финансии Фатмир Бесими, за економија Крешник Бектеши, како и директорот на ЈП за државни патишта, Ејуп Рустеми, и раководители на други институции поврзани со проектот.
.webp){kind=icon}
