.webp){kind=icon}
Според најновиот извештај на Организацијата за земјоделство и храна при Обединетите нации (ФАО), цената на шеќерот е на највисоко ниво. Следната недела ќе анализираме зошто е тоа така и зошто трендот на раст на цената на месото и ориз не запира.
И натаму ќе го анализираме пазарот со недвижности. Овој пат ќе ги бараме најатрактивните станови за продажба во мај, како и најдобрите локации за изнајмување станови и канцелариски простор.
По последното зголемување од средата, основната камата во земјава стигна до 5,75 отсто. Следната недела ќе анализираме дали Народната банка ќе продолжи со затегнување на ременот, со оглед на тоа што инфлацијата и натаму е двоцифрена.
А што е тоа што ја подгрева инфлацијата? Платите во јавниот сектор минимално, но растат. Дали тоа влијае на побарувачката? Ќе анализираме и како растот на минималната плата направи хаос со платите во јавниот сектор и како го решија тоа приватните фирми. Пазарот на трудот ќе го следиме и од аспект на одлив на работната сила. „Мекдоналдс“ во земјава нема, но затоа компанијата што дејствува на хрватскиот пазар бара да регрутира вработени од земјава.
Аналитичкиот тим на „Блумберг Адрија“ за следната недела подготвува регионална анализа за фирмите за достава чиј бизнис интензивно почна да расте за време на пандемијата и стана новото нормално.
Кон крајот на неделата ќе објавиме какви се перспективите за стартап-компаниите за 2024 година и кои од нив ќе ја обележат следната година.
Ќе се занимаваме и со енергетската криза – дали се гледа крајот и какви се перспективите на земјава во наредниот период, кога ќе треба да направат многу измени за производството на струја да стане поисплатливо и поеколошко. На нашите прашања ќе одговара првиот човек на ЕСМ – Васко Стефанов.
Од последниот број на „Блумберг бизнисвик Адрија“ читаме како Кина полека и суптилно презема дел од ингеренциите на Меѓународниот монетарен фонд позајмувајќи им на државите за да ги спаси од непријатни ситуации.
