.webp){kind=icon}
Нема спојување на концесиите за ископ на минерални суровини во Иловица од страна на „Еуромакс ресорсис“. Владата на вчерашната седница ја поништила својата одлука од пред еден месец, соопшти денеска министерот за економија Крешник Бектеши, додавајќи дека тој бил воздржан при гласањето.
„Владата одлучи да престане да важи претходната одлука, а тоа значи дека ние се враќаме таму каде што бевме, не носиме ниту позитивна ниту негативна одлука. Министерството за економија инсистира да се донесе некаква одлука, а која е подобра одлука за интересот на граѓаните ќе покажат времето и аргументите“, изјави Бектеши.
Според Бектеши, оваа нова владина одлука само ја враќа ситуацијата во статус кво и ја изложува Македонија на потенцијална арбитражна постапка, која може македонските граѓани во иднина да ги чини милионски суми како отштета.
„По пет, шест, десет години, моите и вашите деца и на сите граѓани од денешните одлуки можат да страдаат во иднина и да плаќаат милионски суми за административни технички пропусти, Нашите очекувања се дека оваа одлука ќе се спори од страна на концесионерот, што е негово право. Како институција ќе направиме максимум за да ја браниме оваа одлука. Иако морам да бидам многу транспарентен со јавноста. Имајќи ги предвид аргументите што ги презентирав тука и можната правна разврска во иднина, ние како Министерство за економија вчера апстиниравме од оваа одлука на Владата. Но ние не излегуваме во јавност да кажеме дека нема да ја почитуваме оваа одлука, затоа што не сме убедени во неа. Ние ќе направиме сè што е во наша надлежност да ја браниме оваа одлука. Но, сите правници во Министерството и надворешни адвокатски куќи велат дека ова не ја менува суштината“.
И по оваа одлука, концесионерот „Еуромакс“ има сопственост на двете концесии. Владата на 27 јуни гласаше да се спојат двете концесии, првата на локалитетот с. Иловица во општината Босилово, а втората исто така на локалитетот Иловица, но зафаќа дел и во општината Ново Село. Како што соопшти Бектеши, првата концесија, според територијата, целосно се совпаѓа со втората концесија, која опфаќа поголема површина.
МИА
Жителите и невладините организации од струмичкиот регион на 15 јули протестираа против отворањето на рудникот и спојувањето на концесијата, а на протестот учествуваа и министерките за труд и социјална политика и за животна средина и просторно планирање Јованка Тренчевска и Каја Шукова.
