.webp){kind=icon}
Одлука за новата цена на парното греење во Скопје ќе се определи откако ќе се санира мостот „Беласица“ и ќе се постават нови цевки за да може да се користи енергијата од ТЕ-ТО, која е поевтина од другите топлани. Претседателот на Регулаторната комисија, Марко Бислимоски, вели дека нема да се дозволи граѓаните да плаќаат повисока цена поради тоа што институциите не си ја завршиле работата.
„Додека не добиеме цврсто уверување дека ќе се постави цевководот на мостот ’Беласица’, Регулаторната комисија за енергетика нема да донесе одлука за цената на парното. Доколку не се постави цевководот, ќе имаме проблем со произведеното количество на топлинска енергија од ТЕ-ТО, која е трипати пониска отколку цената од топланите“, изјави Бислимоски.
МИА
Тој нагласи дека доколку не се донесе одлука, ќе продолжи да важи постојната цена за парното греење.
„Во Град Скопје и во ЕСМ има разумни луѓе и сметам дека ќе се договорат, е логично е тој што е сопственик на мостот да даде дозвола ’ЕСМ дистрибуција на топлина’ да ги постави цевките, кои се веќе однесени таму“.
Новата цена на парното требаше да се донесе на крајот на јули. Бислимоски не очекува да поскапи цената што ја плаќаат граѓаните за комунален отпад откако РКЕ ја доби обврската да ја определува цената на оваа комунална услуга во сите општини во државата. Тој не очекува ниту драстично да поскапи струјата во текот на грејната сезона на берзите и посочува дека кај нас ќе зависи од цената што ќе ја понуди ЕСМ на тендерот на „ЕВН хоум“.
