Растот на цени во Кина останува близу нулата-дефлацијата опстојува

Потрошувачката инфлација во Кина беше анемична во октомври, додека фабричките цени продолжија да паѓаат, што сугерира дека последната рунда на владини стимулации е далеку од доволна за да ја ослободи економијата од стегите на дефлацијата.

Индексот на потрошувачки цени се зголеми за 0,3 отсто во однос на претходната година, објави денеска Националното биро за статистика, а претходниот месец растот беше 0,4 отсто. Просечната прогноза на економистите анкетирани од „Блумберг“ беше дека бројките во октомрви ќе останат непроменети во однос на септемвриските.

Базичната инфлација, која ги исклучува нестабилните цени на храната и горивата, се зголеми за 0,2 отсто. Постојаноста на инфлацијата на нивото околу нулата нуди најнов доказ дека домашната побарувачка на Кина останува пригушена и покрај стимулативните мерки на Пекинг од крајот на септември, кои вклучија намалување на каматните стапки, повеќе готовина за банкарски заеми и поддршка за акциите и пазарите на недвижнини.

Bloomberg Mercury

 

„Се очекува индексот на потрошувачки цени да остане благ до крајот на годината, што ги зголемува изгледите за дополнително намалување на каматните стапки на почетокот на следната година“, вели Брус Панг, главен економист за Кина во „Џонс ланг“ (Jones Lang LaSalle Inc.).

Фискалниот пакет вреден 1,4 илјади милијарди долари, претставен само ден пред објавата на податоците, е фокусиран на олеснување на должничкиот товар на локалните власти за да им се даде поголем простор за поттикнување на економски раст.

Владата може да биде под поголем притисок да ги засили политиките за зајакнување на потрошувачката бидејќи кинескиот извоз, кој оваа година е клучен двигател на растот на земјата, се соочува со ризик од значително повисоки царини со кои се заканува новоизбраниот американски претседател Доналд Трамп.

Кинеските власти се мачеа да ја зголемат потрошувачката на домаќинствата по долгогодишниот пад во секторот недвижнини и слабиот пазар на труд. Падот на производствените цени, исто така, го притиснува профитот на компаниите и со тоа ги одвраќа од инвестиции.

Вкоренетиот циклус на пад на цените претставува ризик да ги спречи потрошувачите да трошат во очекување дека стоките во иднина ќе бидат поевтини.

„Пазарот трпеливо чека детали за потенцијалниот фискален стимул. Големината е важна, но составот е подеднакво важен“, рече Живеи Жанг, претседател и главен економист на „Пинпоинт“ (Pinpoint Asset Management). Тој додава дека стимулот насочен на страна на потрошувачката би бил поефективен за поттикнување на домашната побарувачка.

Во моментов нема коментари за веста. Биди прв да коментира...

Остави коментар