Инфлацијата во Франција се намали првпат во последните три месеци, следејќи го забавувањето во другите големи економии од еврозоната. Главна причина е избледувањето на минатогодишниот скок на трошоците за енергија предизвикан од војната во Украина.
Потрошувачките цени во Франција во март пораснаа за 6,6 отсто, што е помалку од рекордните 7,3 отсто од ерата на еврото, достигнати во февруари, а токму поради намалувањето на трошоците за енергија. Резултатот, сепак, беше нешто над просечната процена од 6,5 отсто во анкетата на „Блумберг“, спроведена меѓу аналитичарите.
Растот на цените на услугите се намали сосема малку, на 2,9 од 3 отсто, колку што беше во јануари, додека кај производите растот на цените забрза на 4,8 од 4,7 отсто.
Инфлација во Франција / Bloomberg Mercury
Спротивните трендови на инфлација, токму како тие што се гледаат во Франција, се главоболка за Европската централна банка (ЕЦБ), која цели на инфлација од два отсто, но сè повеќе е фокусирана на базичната инфлација, која ги исклучува ставките како енергија и храна.
Слични знаци на отстапки се забележаа и во податоците од Шпанија и Германија, дури и покрај тоа што главниот показател во Шпанија речиси се преполови и падна на 3,1 отсто. Предизвикот на ЕЦБ дополнително се искомплицира со тензиите што ги зафатија банките низ светот, кои се закануваат да го попречат кредитирањето и да ја ограничат економската експанзија.
Во Франција основната инфлација треба да забрза во наредните недели. Статистичката агенција „Инсе“ (Insee) овој месец објави дека показателот веројатно ќе достигне 6,4 отсто во јуни, што е повеќе од предвидените 5,7 отсто. Тоа стана големо политичко прашање за претседателот Емануел Макрон. Неговата влада минатата година интервенираше со огромна поддршка за да ги надомести зголемените трошоци за енергија, но има малку алатки да го стори истото тоа за храната и услугите, а веќе е под голем притисок поради непопуларните реформи на пензискиот систем.
Очекувања за растот на цените / Bloomberg Mercury
Домаќинствата сè повеќе чувствуваат притисок, а процената за неодамнешните зголемувања на цените е на највисоко ниво од 1970-тите години. Сепак, потрошувачите сметаат дека најлошото можеби завршило, бидејќи очекувањата за идните цени почнаа да паѓаат.
Одделните податоци од „Инсе“ покажаа пад на потрошувачката во февруари од 0,8 отсто споредено со јануари, бидејќи домаќинствата ги намалија трошоците за храна и индустриски производи. Економистите анкетирани од „Блумберг“ прогнозираа помал пад од 0,1 отсто.
.webp){kind=icon}
