Светската банка (СБ) денеска соопшти дека политиките насочени кон зајакнување на социјалното вклучување на лезбејките, хомосексуалците, бисексуалците, трансродовите и интерсексуалните (ЛГБТИ) луѓе би можеле да помогнат во градењето поправедни и рамноправни општества и да имаат корист за економиите на Северна Македонија и Србија, јави дописникот на МИА од Белград.
Годишниот бруто-домашен производ (БДП) на двете земји би се зголемил во просек за 0,6 отсто, или вкупно 360 милиони американски долари, според студијата на Светската банка, „доколку се намалат бариерите за влез на пазарот на трудот за ЛГБТИ луѓето што се соочуваат со дискриминација поради сексуална ориентација, родов идентитет и изразување и родови карактеристики“.
Како што се наведува во соопштението, поверојатно е дека ЛГБТИ лицата во Србија ќе бидат во понеповолна економска положба од општата популација.
Едно од седум ЛГБТИ лица во Северна Македонија сè уште се соочува со дискриминација на работното место во однос на вработувањето, отпуштањето и професионалното напредување.
„Пристапот до основните услуги и пазари и можноста за достоинствен живот се темелите на успешниот и одржлив развој“, рече директорот на Светската банка за Западен Балкан, Шаочинг Ју.
Тој оцени дека истражувањето покажува дека „вклучувањето на ЛГБТИ луѓето не само што е вистинската работа туку е и основа за стабилна економија“.
Северна Македонија и Србија спроведоа важни реформи што ги штитат правата на ЛГБТИ луѓето, соопшти Светската банка, додавајќи дека е неопходно да се спроведат клучните реформи договорени како дел од процесот на пристапување во Европската Унија.
.webp){kind=icon}
