.webp){kind=icon}
Стапката на инфлација во Македонија во септември годинава изнесувала 6,6 проценти. Ова ниво на инфлација последен пат статистика го забележа во јануари 2022 година, кога инфлацијата беше на ниво од 6,7 проценти. Според податоците на Државниот завод за статистика, цените на мало во август се зголемиле за 4,7 проценти.
Кога станува збор за храната, во септември се забележува намалување на цените кај свежото и разладеното овошје за 2,7 проценти, маслото и маснотиите за 1,7 проценти, свежиот и разладениот зеленчук, освен компирите и другите коренести плодови, за 1,3 проценти и млекото за 0,4 проценти. Исто така, намалување на индексите на трошоците на животот е забележано и кај воздухопловниот патнички транспорт за 34,8 проценти, туристичките аранжмани за 7,1 проценти, производите за домаќинството - нетрајни за 0,8 проценти, другите печатени материјали за 0,4 проценти, резервните делови и приборот за сопствените превозни средства за 0,3 проценти, малите алатки и преостанатите додатоци за 0,2 проценти.
Зголемување на цените се забележува кај жестоките пијалаци за 2,3 проценти, јајцата за 2,0 проценти, виното за 1,9 проценти, сирењето и урдата за 1,2 проценти, месото, шеќерот, џемот, медот, чоколадите и кондиторските производи за 1 процент, кафето, чајот, какаото за 0,9 проценти, рибата и морските плодови за 0,7 проценти, лебот и житата за 0,6 проценти, прехранбените производи неспоменати на друго место за 0,5 проценти.
Во септември исто така пораст на индексите на трошоците на животот е забележан и кај течните горива за домаќинствата за 6,2 проценти, парамедицинските услуги за 5,4 проценти, гасот за домаќинствата за 4,6 проценти, горивата и мазивата за сопствените превозни средства за 4,1 проценти.
