.webp){kind=icon}
Министерот за економија Крешник Бектеши најави дека земјава ќе бара отштета од Бугарија и дополнителна поддршка од Европската Унија доколку се воведе такса за природниот гас што се испорачува преку нејзина територија и не бидат ослободени количините гас кои се закупени од страна на „Газпром“ за Северна Македонија. Гасоводот е даден под закуп на „Газпром“ до 2030 и најголемиот дел од гасот кој поминува низ него мора да биде руски, за што пак Бугарија воведе повисока давачка.
Bloomberg
„Веќе имаме испратено реакција кон Енергетската заедница и кон Европската комисија и очекувам да се ослободат количините што ги закупил токму „Газпром“ од бугарската страна. Ако тие воведуваат такса за природен гас кој доаѓа од „Газпром“, што е легитимно од нивна страна и тоа може да го направат, тогаш да ги ослободат количините кои се закупени од страна на „Газпром“ кон Северна Македонија. Тоа е нашето барање. Ние не сакаме да се мешаме во делот на фискалната политика која ја прави Бугарија, но секако дека во делот на либерализација на пазарите тука имаме целосно право да се жалиме и да бараме од ЕУ тие да се применат од нивните членки“ вели Бектеши.
Според него дополнителната такса од 10,76 долари за 1.000 кубни метри руски природен гас испорачан преку гасоводот „Балкански тек“ би ја зголемила цената на гасот што во земјата го користат компаниите.
Северна Македонија има право да купува и гас од Азербејџан, како и од други извори, но во таа ситуација Бугарија бара уште еден гасовод од Македонија, која во моментов се снабдува само од едно место кај Крива Паланка.
„Бугарија има барање да имаме втор гасовод. Ние до крајот на годината ќе започнеме со изградба на вториот гасовод со Грција, што е приоритет и е целосно поддржан од страна на ЕБОР, ЕИБ и од нашите стратешки партнери„ истакна министерот.
Бугарија кон средината на овој месец воведе данок за рускиот природен гас што транзитира низ бугарскиот гасовод.
