.webp){kind=icon}
Бугарија в петок треба официјално да ја објави одлуката на парламентот во Софија за укинување на данокот за транзит на руски гас, кој го воведе на почетокот на октомври за да се намали профитот на „Газпром“ (Gazprom) и на Русија за финансирање на војната во Украина.
Иако бугарските власти најавија дека оваа такса ќе ја плаќа исклучиво „Газпром“, земјите корисници на рускиот гас што минува низ Бугарија преку Турски тек сфатија дека тоа ќе значи зголемување на цената на гасот за нивните граѓани и економијата. Меѓу тие земји се Србија, Македонија, Унгарија и Австрија.
Оваа одлука особено ја налути Унгарија, која не само што најави тужба со „Газпром“ и Србија против Бугарија, туку и го забрани нејзиниот влез во шенген-зоната. Од Унгарија велат дека в петок, кога официјално ќе биде објавена одлуката за укинување на данокот на рускиот гас, на Бугарија ќе ѝ биде дозволен влез во шенген-зоната.
„Унгарија ќе го повлече своето противење за влез на Бугарија во европската шенген-зона за слободно движење штом ќе биде официјално објавена одлуката на парламентот во Софија за укинување на данокот за транзит на рускиот гас“, изјави во вторникот унгарскиот министер за надворешни работи Петер Сијарто во видео на својата фејсбук-страница.
Сијарто изјави дека бугарски колега го информирал во понеделникот дека бугарскиот парламент го укинал тој закон. Тој додаде дека кога законот ќе биде објавен во службениот весник на Парламентот в петок, како што се очекува, Унгарија ќе се откаже од своето противење за прием на Бугарија во шенген-зоната и ќе побара од Европската комисија да ја прекине процедурата што ја започна Будимпешта.
Шенген-зоната на слободно движење вклучува 23 од 27 земји на Европската Унија (ЕУ), како и Швајцарија, Норвешка, Исланд и Лихтенштајн. Земји што се членки на ЕУ, а сè уште не се членки на Шенген зоната се Бугарија, Кипар и Романија.
