Кој води во трката за осигурителниот пазар во Македонија?

Натпросечно големиот износ на улатени премии за имотно осигурување во март, на осигурителната компанија „Еуролинк“ ѝ ја донесе водечката позиција на пазарот за неживотни осигурувања на крајот од првиот квартал во 2025 година. Иако 2024 година како лидер според бруто-полисираната премија (БПП) ја заврши „Македонија осигурување“ со 17,6 отсто пазарен удел (поради присоединувањето на осигурителната компанија „Винер – Виена иншуренс груп“ кон „Македонија осигурување“, која е исто така дел од австриската групација, н.з.), во првиот квартал годинава најголема вредност на БПП од 16,7 милиони евра има „Еуролинк“, од кои 10 милиони евра се само за имотно осигурување во март. Познавачите на пазарот велат дека во вакви случаи најверојатно се работи за обнова на договор или склучување на нов договор со голем клиент, од калибарот на енергетските компании во земјава, аеродроми и сл. 

Па така, според податоците на Агенцијата за супервизија на осигурувањето  и Националното биро за осигурување, пазарниот удел на „Еуролинк“ на крајот од првиот квартал бил речиси една четвртина (24,7 отсто), пред „Македонија осигурување“ со 14,3 отсто, „Триглав“ со 12,1 отсто, „Уника“ и „Кроација осигурување“ со по 10 отсто итн. 

Сите класи неживотно осигурување со пораст

Пазарот продолжува со раст и во 2025 година, со тоа што вкупната БПП на сите компании од неживотното осигурување изнесува 67,6 милиони евра, што е за 19 отсто повеќе во однос на истиот период лани, додека кај животното осигурување БПП е 12,4 милиони евра или 15,3 отсто повеќе. Вкупниот осигурителен пазар има раст од 18,5 отсто. Ако споредиме пак со бројките од пред три години, на пример, во првиот квартал имаме поголема вкупна БПП од дури 65 отсто.

Во делот на бруто исплатените штети (БИШ) има раст од 10,3 проценти и тие изнесувале вкупно околу 26 милиони евра во првиот квартал, при што кај неживотното осигурување има раст од 12,4 проценти, на 21,3 милиони евра, а кај животното осигурување растот е 1,4 отсто, на 4,7 милиони евра. Зголемен е и бројот на исплатените штети, за 14 проценти, односно околу 41,5 илјада осигуреници – граѓани, компании и институции – добиле обесштетување покриено со нивното осигурување.

Неживотните осигурувања, сегмент со  вкупно 18 класи во националната класификација, во првиот квартал од 2025 година учествувале во вкупната продажба на осигурителни полиси со безмалку 85 проценти, а нивната вредност е за 10 милиони евра или 19 отсто повисока во однос на претходната година, што значи дека компаниите активно работат на раст на пазарот за неживотни осигурувања. Сите категории во овој сегмент имаат пораст во 2025 година, при што најголем скок има во категоријата „имотни осигурувања“, од речиси 50 проценти, што се должи пред сѐ на големиот скок кај овие осигурувања во „Еуролинк“, што споменавме претходно.

Кај животното осигурување сѐ уште има доста простор за раст

На пазарот за животно осигурување, каде што работат шест компании, првиот квартал од 2025 година на лидерската позиција го завршила повторно компанијата „Кроација живот“ со 27,5 проценти пазарен удел, пред „Триглав живот“ со 25,2 проценти и „Винер живот“ со 21,4 проценти. „Кроација живот“, „Винер живот“, „Триглав живот“ и најмладата компанија на пазарот, „Прва живот“, го зголемиле својот пазарен удел во првиот квартал, додека  „Граве“ и „Уника живот“ загубиле понекој процент од своето пазарно учество. На пазарот за животно осигурување граѓаните и компаниите вложиле 12,4 милиони евра, за околу 15 отсто повеќе во однос на истиот период од 2024 година.

Животното осигурување во Македонија учествува со помалку од 20 проценти во вкупното осигурување, конкретно околу 15 отсто за првиот квартал, за разлика од поразвиените пазари во регионот и западните економии, каде што е застапено со повеќе од една третина. Тоа значи дека сѐ уште има голем простор за раст, кој осигурителните компании за живот треба да го искористат. Податоците за осигурувањето живот покажуваат дека во структурата доминира осигурувањето со штедна компонента. Кај овој производ суштинска е материјалната заштита за членовите на семејството на осигуреникот во случај на негова смрт. А дополнителна бенефиција е тоа што вложените средства всушност се заштеда доколку осигуреникот го доживее истекот на осигурувањето. А на заштедата има и принос, кој е однапред дефиниран. Ова е најстар продукт што на нашиот пазар за животно осигурување се продава повеќе од 20 години.

Интенција на особен и силен раст има кај ризико осигурувањето – продукт што нема штедна компонента. Кај ова осигурување се осигурува само животот во определен временски рок. Доколку не се случи ризикот, компанијата ги задржува сите вложени средства. Ова осигурување бележи голем раст како обезбедување на банкарските кредити што ги подигаат граѓаните.

Значаен раст во последните пет години бележи осигурувањето со учество во добивката, кое има инвестициска компонента. Тоа е популарно познато како јунит линкд (Unit Linked) осигурување. Кај овој продукт дел од средствата се вложува во финансиски инструменти (удели во фондови и акции) чии цени се променливи, пазарни и зависат од берзите.

Во моментов нема коментари за веста. Биди прв да коментира...

Остави коментар