.webp){kind=icon}
Министерот за економија Крешник Бектеши уверува дека од 1 јануари ќе нема зголемување на износот на фактурата за струјата за граѓаните и покрај новата методологија и новата ставка за пристап до мрежа, од која, според него, се засегнати граѓаните што имаат викендички, по две-три куќи или два-три стана.
Тој негира дека се компензира воведената евтина тарифа со новата ставка во фактурите поради тоа што, како што појасни, граѓаните што имаат поголема потреба од поддршка се повеќе во рамките на првиот и вториот блок во потрошувачката. Тие што се во четвртиот блок, според него, немаат никаква потреба да бидат поддржани од страна на државата.
Одговарајќи на новинарски прашања, Бектеши рече дека енергетските компании можат да бараат и 400 и 500 отсто во делот на трошоците што ги пријавуваат и во согласност со тоа што планираат да инвестираат, но оти Регулаторната комисија за енергетика ќе одлучи колку ќе ги прифати тие трошоци.
„Дваесет и седум отсто не е некое големо побарување ако споредиме со претходните години од страна на МЕПСО и од страна на ’ЕВН дистрибуција’ и ’ЕВН хоме’ најверојатно нема да бидат прифатени. Цената за домаќинствата и малите потрошувачи нема да се зголеми од 1 јануари, во спротивно ќе имаат дополнителна можност со користење на евтината тарифа да им биде намалена“, рече Бектеши.
Тој порача дека има правична методологија и во согласност со категориите на граѓани.
„Во рамките на Енергетскиот совет речиси веќе една година се работи на нова методологија за да се врати евтината тарифа, наедно на новите давачки, а тоа ќе тангира одредени групи граѓани што имаат викендички, по две-три куќи, два-три стана и слично, поради тоа што во делот на наплаќање за дистрибутивната мрежа повеќе плаќаат тие граѓани што навистина користат електрична енергија, каде што пресметката се применува врз потрошувачката и колку е користено како мрежа. Тие што имаат викендички и користат еднаш, двапати, трипати во годината, тие што не ги користат становите, куќите, ќе го платат тој надомест, а за граѓаните што навистина користат електрична енергија и имаат еден стан или куќа ќе се намали ставката за дистрибутивна мрежа. Тоа значи дека имаме правична методологија и во согласност со категориите на граѓани во нашата држава“, рече Бектеши.
Како што дополни тој, најранливите категории граѓани што имаат просечна потрошувачка во првиот и вториот блог ќе плаќаат помалку во делот на електричната енергија и во вкупната сметка за струјата, имајќи ја предвид и цената на дистрибутивната мрежа.
„Граѓаните што имаат два-три стана, викендички или слично ќе имаат фиксен надомест во текот на целата година, имајќи предвид дека ако еднаш го користат тој простор, кога одат во тој стан или викендичка тие имаат електрична енергија, затоа ја плаќаат другите граѓани во моментот во согласност со постојната методологија. За да бидам јасен, зголемување на цената во фактурите на граѓаните нема да има од први јануари во согласност со новата методологија“, рече Бектеши.
Граѓаните што имаат поголема потреба од поддршка, потенцира тој, се во рамките на првиот и вториот блок.
„Повеќе од 40-50 отсто од нашата потрошувачка е во тие два блока. Јас и во време на енергетска криза наведов дека не треба да субвенционираме граѓани што имаат големи приходи и трошат колку што троши една фабрика во нивните домаќинства. Треба да го направиме спротивното, треба тие да плаќаат во согласност со пазарот и тоа што го трошат затоа што имаме домаќинства што имаат станови и викендички низ цела Македонија и тие имаат електрична енергија кога одат таму, а во делот на цената на дистрибутивната мрежа плаќаме секојдневно ние што живееме во нашите домови. Евтината тарифа ќе продолжи да се имплементира како мерка од страна на Регулаторната комисија за енергетика, а ставката ќе биде платена фиксно во текот на цела година, а во делот на цената на дистрибутивната мрежа, тоа ќе биде намалено за првиот и вториот блок, каде што влегува поголемиот дел“, појасни Бектеши.
Тие што се во четвртиот блок, дополни тој, немаат никаква потреба да бидат поддржани од страна на државата.
„Тоа е мојот личен став, имајќи ја предвид структурата на домаќинствата во нашата држава и кои категории граѓани имаат поголема потреба. Каква ќе биде одлуката на Регулаторната комисија за енергетика немам никакво влијание, затоа што е независна. Но, ако се прашувам јас, четвртиот блок ќе биде дополнително зголемен заради тоа што тие имаат можност, а наедно и ќе може да се влијае во намалувањето на потрошувачката во целина, што е и цел на секоја држава, особено во време на транзиција, кога се преминува во инвестиции во обновливи извори на енергија“, наведе Бектеши, кој учествуваше на настан по повод 10 години од основањето на Фондот за иновации и технолошки развој.
