Претседателот Доналд Трамп изјави дека САД мора да одговорат откако го обвини Иран за соборување на американски воен хеликоптер кај Оман, што претставува нова закана за мировниот договор за којшто со недели веќе зборува дека е блиску.
Немаше веднаш индикации за тоа каква акција планираат САД. Министерот за надворешни работи на Иран подоцна објави на социјалните мрежи дека „странските сили во близина на нашата територија се во постојан ризик“, додавајќи дека „најдоброто решение е тие да си заминат“. По коментарите на Трамп, цените на акциите во САД го продлабочија својот пад, а цените на нафтата ги намалија претходните загуби.
Добро утро, ви пишува Игор Петровски, од дигиталната редакција на „Блумберг Адрија“. Ова се петте вести што ги издвоивме за почеток на денот:
Македонските инвеститори се вртат кон странските берзи: Вложиле 110 милиони евра во 2025.
Македонски резиденти во текот на минатата година преку пет домашни овластени правни лица (четири банки и една брокерска куќа) на странските пазари вложиле 6,7 милијарди денари(околу 110 милиони евра), што е зголемување од 6,97 проценти во однос на претходната година кога на странските пазари бил реализиран промет од 6,3 милијарди денари(околу 102,8 милиони евра), покажуваат податоците на Комисијата за хартии од вредност.
Во вкупно реализираниот промет (домашен пазар и странски пазари од 16,3 милијарди денари односно околу 266 милиони евра) од страна на овластените учесници на годишно ниво во 2025 година на тргување на странски пазари отпаѓаат 41,45 проценти, додека останатите 58,55 проценти (9,5 милијарди денари или околу 155 милиони евра) од вкупно реализираниот промет е на домашниот пазар.
ММФ препорачува даночни реформи за Македонија кои ќе не „здоболат“
На Македонија ѝ е потребен значителен фискален простор за да ги ограничи високите фискални дефицити и да се справи со зголемените притисоци за трошење, се наведува во последниот извештај на Меѓународниот монетарен фонд за Македонија во којшто меѓудругото се препорачуваат промени во даночните политики.
„Фискалните дефицити се зголемија по пандемијата, доведувајќи го јавниот долг близу 60 проценти - границата утврдена со фискалното правило. 90 проценти од владините трошења се наменети за тековни недискрециони расходи, за кои се предвидува дека ќе го поттикнат поголемиот дел од очекуваното зголемување на трошењето во наредните децении“, пишува во извештајот.
ИПО-то на Илон Маск ги збесна инвеститорите: фрчат нарачки за акциите на „Спејс екс“
Иницијалната јавна понуда (ИПО) на „Спејс екс“ (SpaceX) предизвикува побарувачка од институционални инвеститори за неколкукратно поголем број на акции од расположливите, според луѓе запознаени со ова прашање, како што се приближува берзанското деби на компанијата за ракети, сателити и вештачка интелигенција, предводена од Илон Маск.
Банките што го водат ИПО-то им кажаа на инвеститорите рано во вторникот дека има дополнителна побарувачка од она што го дознале од состаноците со менаџментот, рекоа луѓето, кои побараа да не бидат идентификувани бидејќи информациите се приватни. Бројот на нарачки за акции е зголемен од понеделникот, рекоа изворите. Банките велат дека ИПО-то е значително преоптоварено, објави Блумберг Њуз.
Производителите на чипови го разнишаа Волстрит среде тензијата САД-Иран
Нов бран на распродажби ги зафати глобалните берзи во вторникот, бидејќи ескалацијата на Блискиот Исток се судри со растечката вознемиреност околу технолошките акции, ги потресе инвеститорите и го попречи закрепнувањето кон рекордни максимуми.
Производителите на чипови, кои го поттикнаа закрепнувањето од најниските нивоа предизвикани од војната, силно се занишаа и паднаа за пет отсто. Nasdaq 100 изгуби 2,5 отсто. Додека повеќето акции во S&P 500 пораснаа, слабоста во технологијата го испрати индексот надолу за над еден отсто.
Формула 1 како економија на луксуз: Од револуцијата на Еклстоун до тимот „Гучи Алпин“
Од 4 до 7 јуни Монако беше во знакот на Големата награда на Формула 1, настан што секоја година ги собира бизнис-лидерите и клучните актери на луксузната индустрија. Не помалку внимание привлече и присуството на Ким Кардашијан, која дојде за да го поддржи својот нов партнер, возачот на „Ферари“, Луис Хамилтон.
Посебно внимание привлекоа и модните моменти во текот на викендот. Кардашијан носеше главно „Гучи“, вклучувајќи кожен тркачки комбинезон на „Гучи“, како и уникатно изработен фустан со откриени рамена, кој за главната трка го дизајнираше нејзината поранешна љубов и креативен директор Демна. Оваа своевидна подвижна реклама за „Гучи“ претходниот викенд е сигнал за амбициозниот влез на овој моден бренд од луксузната групација „Керинг“ во престижното натпреварување преку милионски спонзорски договор со тимот „Рено Алпин“.
.webp){kind=icon}
