Од денеска треба да бидат ставени во функција наплатните рампи Преод и Кадрифаково на автопатот Миладиновци- Штип. На наплатните рамки, како што најави Јавното претпријатие за државни патишта, целосно ќе функционира електронскиот систем за наплата на патарина.
Оттаму во четвртокот информираа дека првите две ленти од десно ќе бидат за возилата кои користат М-таг електронски уред со кој се поминува со намалување и успорување на брзината на движење на возилото и без запирање, додека на останатите ленти покрај наплата во готово, може да се употреби и М-смарт картичката.
Наплатните станици Преод и Кадрифаково имаат по седум наплатни кабини.
Според финансиските показатели од работењето на Јавното претпријатие во првиот квартал од годинава, односно само од јануари до март, приходите имаат раст од над 26 отсто во однос на минатата година.
Најмногу пораснала на приходната страна ставката други приходи, која има раст од околу 300 отсто, додека на страната на расходите најголем е растот кај трошоците за суровини и материјали.
Приходите од патарина се значаен но не и најголемиот приход за Јавното претпријатие за државни патишта. Повеќе пари во неговата каса во првиот квартал годинава стасале од делот од акцизата на нафтени деривати кои ја плаќаат граѓаните и стопанството кога точат бензин. По тој основ во буџетот на претпријатието годинава до март се слеале за 50 отсто повеќе пари од лани или 993 милиони денари (16,1 милион евра)
Само по основ на патарини за првите три месеци инкасирани се 581 милион денари (9,5 милиони евра) што е за 6,8 отсто повеќе од истиот период лани.
Вкупните приходи на Јавното претпријатие изнесуваат во првиот квартал над два милијарди денари (над 33 милиони евра), а вкупните расходи се 1,7 милијарди денари (27 милиони евра).
.webp){kind=icon}