.webp){kind=icon}
ЕСМ да набави јаглен веднаш, за да може непречено да произведува струја, да се обезбеди мазут за ТЕЦ Неготино и да се разгледа можноста ТЕ-ТО да произведува струја цела година. Ова се клучните заклучоци на Македонската енергетска асоцијација - МЕА при Стопанската комора донесени на последната седница.
Стопанствениците бараат и и да се приклучат на мрежата на ЕВН фотоволтаиците кои во моментов во земјата ги има 40 до 45 мегавати кои се инсталирани и/или се инсталираат. Додаваат и дека за да може да се обезбедат нови количини на мазут потребно е да се пушти продажбата на слободен пазар, односно да се тргне од листата на регулирана цена. Според МЕА, се додека мазутот го држиме по регулирана цена, истиот тешко ќе се набави, а подоцна може да има и недостиг на пазарот.
Се бара и Владата да ја врати Уредбата која беше во функција во услови на прогласена кризна состојба со која целокупната произведена енергија од обновливи избори беше насочена само за индустријата.
„Имено, Уредбата што ја имаше донесено Владата во услови на кризна состојба предвидуваше, произведената електрична енергија од повластените производители да оди само кон индустријата а не и кон домаќинствата, со што се овозможуваше индустријата да обезбедува од 15 до 17 проценти од потребите за енергија од домашни обновливи извори, чија цена беше помеѓу 90 и 110 евра. Тоа беше и единствена мерка за поддршка на индустријата во делот на набавка на енергенси со поповолни услови. Со укинување на таа Уредба енергијата произведена од обновливи извори наменета за индустријата се намали за цели 8 процентни поени и сега изнесува од 6 отсто до 7 отсто, што значи со губењето на енергија од обновливите извори за потребите на индустрија производните трошоци на компаниите ќе растат, стои во соопштението на МЕА чиј претседател е Кочо Анѓушев.
МЕА бара и измени во Законот за градба, со цел легализирање на индустриски капацитети/објекти само со Г намена (за незагадувачка индустрија), кои се изградени согласно веќе донесените урбанистички планови и имаат основни проекти, но немаат дозвола за градба од повеќе објективни причини.
Според нив, постојат многу индустриски објекти и производни хали, кои се изградени согласно урбанистичките планови, на сопствено земјиште, меѓутоа за истите се`уште немаат обезбедена градежни дозволи и денеска се водат како нелегални (без градежна дозвола), а сепак ги исполнуваат сите услови. Ова пред се поради фактот што за да поставиш фотоволтаици на крововите од индустриските објекти, хали, потребно е истиот да има градежна дозвола што значи да биде легален објект, за да можат да ги создадат условите да постават фотоволтаици.
Имаат и други барања.
„Владата на РСМ да воспостави деловна комуникација со сите Влади на соседните држави за истите да издадат гаранции кон нашата држава дека во текот на претстојниот зимски период нема да ги затворат границите за проток на електрична енергија. Односно дека ниту една држава нема да ја затвори границата и да ги сведе cross border (преку граничниот проток на електрична енергија) капацитетите на 0.
Регулаторна комисија за енергетика да припреми правилник за организирање дистрибутивни мрежи. Зошто? Затоа што со зголемување на инсталираната моќност од фотоволтаиците ќе настане потреба од градење на 110 киловолтни трафостаници а на тие ќе има можност да се приклучат и други производители. За да може тоа да се реализира треба Регулаторната комисија за енергетика да направи Правилник за дистрибутивни системи. Да се спречат злоупотребите на стопанските субјекти кои се префрлаат на универзален снабдувач а при тоа ги исполнуваат условите да бидат на слободен пазар. Тоа е работа на Регулаторна комисија за енергетика, која при вака констатирани злоупотреби треба да му даде налог на ЕВН истите да се прекинат, бидејќи со таквата злоупотреба се прават две штети. Прво се ставаат економските субјекти во нерамноправна положба и второ непотребно се оптоварува ЕСМ, велат од МЕА.
Согласно усвоените заклучоци на седницата на МЕА, се очекува следните денови многу брзо и работна средба со Владата на РСМ и Регулаторната комисија за енергетика со цел изнаоѓање решенија за актуелната енергетска криза и изнаоѓање решенија во пресрет на зимскиот период.
