Забавува станбеното кредитирање

Во јуни годинава, вкупните депозити остварија месечно и годишно зголемување од 0,4 проценти и 1,8 проценти, коешто во целост е резултат на зголемувањето на депозитите на секторот „домаќинства“, соопшти Народната банка. Истовремено, вкупните кредити во јуни, забележаа месечен и годишен раст од 1 и од 10 проценти. Од централната банка објаснуваат дека позитивната промена кај двете основи е одраз на повисокото кредитирање кај двата сектора, коешто е поизразено кај корпоративниот сектор.

Во јуни депозитите на домаќинствата забележаа раст од 1 процент на месечна основа. Нагорната промена во најголем дел се должи на зголемувањето на краткорочните депозити во странска валута, при помало позитивно влијание и на депозитните пари и долгорочните депозити во странска валута, а во услови на пад на долгорочните и краткорочните депозити во денари.

„Годишната стапка на раст од 5,2 проценти пред сè произлегува од зголемувањето на краткорочните депозити во странска валута, а во помала мера од зголемувањето и на долгорочните депозити во странска валута и на депозитните пари, при остварен пад на долгорочните и краткорочните депозити во денари“, велат од Народната банка.

Во јуни, вкупните кредити на домаќинствата на месечно ниво се зголемија за 1 процент, како резултат на зголеменото кредитирање во денари и во странска валута, малку поизразено кај кредитите во странска валута.

„Во однос на истиот месец минатата година, кредитите на домаќинствата се повисоки за 7,7 проценти, при што зголемувањето во поголем дел произлегува од зголемените кредити одобрени во денари“, соопшти Народната банка.

Во јуни, анализирано според намената на кредитите одобрени на физичките лица, потрошувачките и станбените кредити, како најзастапени категории, бележат месечен раст од 1,1 процент, соодветно, а на годишна основа се повисоки за 6,8 и 14,9 проценти. Статистиката на Народната банка покажува дека годишниот раст на станбените кредити во јуни бележи намалување во однос на мај, годинава кога изнесуваше 15,8 проценти, како и во однос на декември, минатата година кога растот кај станбените кредити бил 15,5 проценти.

„Aвтомобилските кредити, овој месец, се намалија на месечна и годишна основа за 0,3 проценти и 6,4 проценти, соодветно. Во јуни, кредитите одобрени на кредитни картички бележат месечно зголемување од 0,7 проценти, а на годишно ниво се пониски за 2,1 процент. Негативните салда на тековните сметки остварија месечен и годишен раст од 0,6 и 1,5 проценти, соодветно. Кредитите одобрени врз други основи, овој месец, се намалија за 1,4 проценти на месечна основа и за 35,8 проценти на годишна основа“, информираат од Народната банка.

Вкупните депозити на корпоративниот сектор, во јуни, се намалени за 0,2 проценти во однос на претходниот месец.

„Надолната промена во поголем дел е резултат на намалувањето на краткорочните депозити во странска валута, како и долгорочните депозити во денари, а во помал дел и на долгорочните депозити во странска валута, во услови на забележан раст на депозитните пари и краткорочните депозити во денари. Анализирано на годишна основа, депозитите на корпоративниот сектор бележат пад од 4,8 проценти, главно поради намалувањето на долгорочните депозити во странска валута, како и депозитните пари, долгорочните и краткорочните депозити во денари, а во услови на раст на краткорочните депозити во странска валута“, информираат од Народната банка.

Кредитите на корпоративниот сектор, овој месец, бележат месечен раст од 1,1 проценти, што во целост се објаснува со зголемувањето на кредитите во странска валута, во услови на мал пад на кредитите во денари. Годишната промена е позитивна и изнесува 12,4 проценти, поради растот на кредитите во денари и во странска валута, којшто е поизразен кај кредитите во денари. 

Во моментов нема коментари за веста. Биди прв да коментира...

Остави коментар