Од следниот месец прогласуваме кризна состојба за струја, вели Бектеши

Oчекуваме тешка зима и затоа Министерството за економија планира во август да прогласи кризна состојба во делот на електричната енергија, најави денеска ресорниот министер, Крешник Бектеши и порача дека не очекува да има рестрикции доколку сè се одвива според планот.

„Планираме да ја ставиме во функција посебната комисија согласно Законот за енергетика и во август да прогласиме кризна состојба во делот на електричната енергија. Таа комисија согласно правилникот и одредбите предвидени и во Законот и во уредбата која е усвоена од страна на Владата, предвидува различни мерки, вклучувајќи ги и рестрикциите. Но, ако се одвива сè согласно планот и во случај да нема забрана на увоз на електрична енергија, како што сме имале во одредени периоди во минатото од страна на Бугарија, не верувам дека би имало рестрикции во нашата држава“, изјави Бектеши.

Bloomberg Adria изминатиот месец во неколку наврати пишуваше со состојбата во енергетскиот секор. Експертите што ги конултиравме предупредија дека претстојниот период ќе биде исклучително тежок за компаниите во земјава кои се снабдуваат со струја. Цената на овој енергенс е во континуиран раст од лани ова време, а за последниот квартал од оваа година се тргува по цена од над 400 евра за мегават час на унгарската берза. Пишувавме и за евентуалниот прекин на дотокот на гас до земјава преку Бугарија, за што сега зборува и министерот. Во таква ситуација загрозено би било испорачувањето на греење за скопјани зимава, но ќе се проблематизира и работата на повеќе големи индустриски капацитети. Од Владата ни одговорија дека алтернатива за гасот за земјава е мазутот, што пак за експертите не е решение на проблемот. Сега министерот вели дека мазут е нарачан и дека веќе е на солунското пристаниште.

Тој нагласи дека ќе ја имаме најтешката зима, а ситуацијата, како што рече, е толку сериозна и непредвидлива и не зависи само од нашата земја и од државите во регионот, туку зависи и од начинот како ќе се одвива војната во Украина.

„Денеска добивме добри вести дека почнало да има снабдување со природен гас. Правиме напори да имаме алтернативи на снабдување со природен гас и во случај ако има целосна забрана, тогаш треба да користиме алтернативен енергенс со цел да работат топланите и индустриските капацитети, а и индустријата и домаќинствата да не останат без снабдување со електрична енергија“, истакна Бектеши.

Bloomberg

За таа намена, посочи, веќе се набавува мазут и истакна дека во солунското пристаниште е стигнат брод со мазут за потребите на земјава.

„Во делот на алтернативите, согласно Законот е предвиден да има друг енергенс освен природниот гас. Но, имајќи ја предвид технологијата што ја имаат нашите капацитети, и топланите и електраните, тие ако треба да се префрлат од природен гас може да одат само на мазут. И тоа е реалноста во нашата држава бидејќи такви капацитети имаме“, посочи министерот.

Правиме напори, додаде, да обезбедиме природен гас од друг извор, освен од „Гаспром“, но тоа зависи од ослободувањето на капацитетите во Бугарија и договорот што го има „Булгар трансгас“ со „Гаспром“ за закупување на сите капацитети до 2030 година.

„Ако тие капацитети се ослободат од страна на 'Булгар трансгас' ние сме подготвени да се снабдуваме со природен гас од други извори, вклучувајќи ги Азербејџан, но и енерџи терминалите, било тоа во Грција, било тоа во Турција“, истакна Бектеши.

Порача дека моменталната цена на електричната енергија на берзата ХУПЕКС е околу 420 евра за мегават час или речиси 10 пати поголема во споредба со цената од 48 евра за мегават час што ја нуди ЕСМ за домаќинствата и нагласи дека се очекува оти зимава ќе биде и околу 500 евра за мегават час.

Нагласи дека се прават напори ЕСМ да ги обезбеди сите потреби на домаќинствата и на 67-те илјади микро и мали компании кои се на регулираниот пазар.

„И малите и микро компаниите на некој начин се субвенционирани од државата и за нив цената на електричната енергија се движи од 205 до 210 евра за мегават час што е двојно пониско од пазарната. Само 4.500 компании се на слободниот пазар од кои повеќето имаат договори за набавка на електрична енергија со пониски цени од пазарната. Сепак ќе се сретнам со Стопанската комора за да видиме што може да се направи за да им помогнеме“, рече Бектеши.

Прецизираше дека Третиот блок на РЕК Битола ќе биде ставен во функција на 1 октомври наместо на 15 ноември како што првично било планирано и оти за тоа се направени сите подготовки. РЕК Осломеј денеска ќе биде исклучен од системот за да се направат потребните ремонти и од септември да биде во функција, а следната недела ќе биде ставена во функција и една постројка во ТЕЦ Неготино. 

Во моментов нема коментари за веста. Биди прв да коментира...

Остави коментар