Како држава чија намера е целосно да се интегрираме и да станеме членка на ЕУ, ги следиме западните политики, но треба да го сносиме и лошото и доброто. Во тој контекст, ќе ги следиме и сите препораки за плаќањето на рускиот природен гас, потврди денеска министерот за економија, Крешник Бектеши.
„Како Министерство за економија ќе ги следиме сите одлуки што се носат од страна на Европската комисија (ЕК) и секоја одлука што ќе ја донесат ќе ја донесеме и ние преку Министерството за надворешни работи, вклучително и во делот на енергенсите. Наш интерес е да ја зголемиме сигурноста во делот на снабдување со енергенси и да го диверзифицираме снабдувањето со природен гас и затоа наскоро ќе се објави тендерот за изградба на новиот гасен интерконектор со Грција. Бараме од ЕК да влијае на Бугарија да се ослободат капацитетите кои се закупени од страна на 'Гаспром'“, рече Бектеши во одговор на прашање на денешната средба со новинарите.
Тој нагласи дека се прават подготовки за обезбедување на мазут за топланите и енергетските капацитети за да работат во континуитет, доколку Русија одлучи да го запре снабдувањето со природен гас за земјава.
„Моментно гасот не го плаќаме во рубли, но доколку Русија инсистира, а Европската комисија има одлука да не се плаќа во рубли и ние нема да го правиме тоа. Како држава до овој момент со гас се снабдуваме само од 'Гаспром', имајќи предвид дека сите капацитети се закупени од тој оператор“, посочи Бектеши.
Земјава во моментот е 100 проценти зависна од руски природен гас кој го набавува преку гасоводот со Бугарија каде до 2030 година руски „Гаспром“ ги има закупено сите капацитети за транспорт на гас до нашата граница.
Bloomberg Chartmaker
.webp){kind=icon}