Народната банка ги претстави најновите проекции пред дипломатскиот кор

Гувернерката Анита Ангеловска-Бежоска ги претстави најновите макроекономски проекции на Народната банка пред дипломатскиот кор и пред претставниците на меѓународните институции. На настанот, кој се организира редовно по секој нов циклус макроекономски проекции на Народната банка, присуствуваа претставници на Меѓународниот монетарен фонд (ММФ), Светската банка (СБ), Делегацијата на ЕУ (ДЕУ), Обединетите нации (ОН), Програмата за развој на Обединетите нации (УНДП), како и на дипломатските претставништва на Бугарија, Кина, Косово, САД, Словачка, Унгарија, Холандија, Швајцарија, Шпанија и на Шведска, соопштија од Народната банка.

Во презентацијата беше наведено дека се предвидува натамошно забавување на инфлацијата, која минатата година се сведе на едноцифрено ниво, во согласност со остварувањата во првиот квартал годинава, со просечна годишна стапка од 3,4 отсто, кои се пониски од октомвриските проекции.

Се предвидува дека просечната инфлација за 2024 година ќе забави, сведувајќи се на 3,5 отсто, од 9,4 отсто минатата година, одразувајќи ги натамошниот пад на цените на нафтата и храната на светските пазари, забавувањето на странската ефективна инфлација и затегнатите финансиски услови.

На среден рок се очекуваат натамошно забавување на инфлацијата и нејзино сведување на историскиот просек од околу два процента.

„Сепак, ризиците околу инфлацијата сѐ уште постојат и се поврзани главно со цените на примарните производи, промените на регулираните цени, како и со политиките на страната на побарувачката. Притоа, гувернерката истакна дека засега е задржана определбата за претпазливост во монетарната политика, а идните промени ќе зависат од трендовите на девизниот пазар и движењето на инфлацијата и инфлациските очекувања, како и од поставеноста на ЕЦБ“, се наведува во соопштението од Народната банка. 

Осврнувајќи се на преостанатите макроекономски показатели, гувернерката посочи дека при раст на глобалната економија, а особено на нашите трговски партнери, се очекува дека македонската економија ќе расте со стапка од 2,6 проценти оваа година и 3,6 проценти во следната година, а потоа растот умерено ќе забрза на среден рок. При проектирани солидни нето-приливи на финансиската сметка, кои би го надминале умерениот дефицит на тековната сметка, се очекува натамошен раст на девизните резерви, како гаранција за стабилноста на девизниот курс.

„Глобалните услови и натаму се неизвесни и непредвидливи, што создава ризици за економскиот раст, инфлацијата и екстерната позиција, нагласувајќи ја потребата за водење претпазливи домашни макроекономски и структурни политики. Народната банка внимателно, на дневна основа, и натаму ќе ги следи макроекономските податоци и ризиците и, како и досега, ќе ги презема сите неопходни мерки, користејќи ги сите расположливи инструменти, заради одржување на стабилноста на девизниот курс и стабилизирање на инфлацијата на среден рок“, се посочува во соопштението.

Во моментов нема коментари за веста. Биди прв да коментира...

Остави коментар