Паѓа интересот за купување стан, расте бројот на кираџии

Втора година по ред се намалува продажбата, а расте закупот на недвижности. Според податоците на Агенцијата за катастар на недвижности објавени во годишниот извештај, од околу 33.000 регистрирани трансакции лани, 23.545 биле продажби, што е пад за четири отсто споредено со 2022 година. Бројот на регистрирани закупи пак се зголемил за девет отсто.

Податоците на Катастарот покажуваат дека лани најголем бил бројот на закупи на деловен простор, но во овој сегмент има намалување во однос на 2022 година. Кај становите, пак, лани имало најголем пораст. Вкупно биле регистрирани над 400 закупи повеќе на годишно ниво.

Статистиката понатаму покажува дека становите главно ќе бидат зафатени уште еден месец. Во јули лани имало најмал број на закупи, само 562. Двојно повеќе закупи биле регистрирани во октомври, што се поврзува со почетокот на академската година.

Податоците на Агенцијата за катастар за закупите се однесуваат само на трансакциите што се регистрирани во институцијата на територијата на цела држава.

Кириите забележаа драстичен раст по ковидот

Трендот на забрзан раст на цените на недвижностите во земјава почна по ковид-кризата. Во последниот квартал од 2021 година е забележана првата двоцифрена стапка на раст, а врвот е достигнат една година подоцна. На крајот на 2022 година цените на недвижностите беа за 20 отсто повисоки на годишно ниво.

Растот на цените ги опфати и кириите. Годишните податоци на Катастарот покажуваат дека вредноста на закупите на станови регистрирани лани изнесувала 677.000 евра или просечната цена за стан под кирија во Македонија изнесувала околу 225 евра.

Споредено со 2022 година, просечната цена е зголемена за две евра. Истиот тренд важел и една година претходно, но во 2021 година цените за кирија пораснале за 20 евра споредено со пандемиската 2020 година.

Сепак, просечната кирија од 225 евра е малку веројатна во Скопје. Во главниот град за еднособен стан, во делови од градот надвор од центарот за новоградба цените достигнуваат и до 280 евра. Месечниот трошок за постар стан изнесува околу 150 евра. Кириите за поголемите станови, околу 60 квадратни метри, надминуваат 400 евра. На поелитните локации, цените за истата квадратура стигнуваат и до 600 евра. Во овој опсег се и цените објавени на веб-страницата „Нумбео“, најголемата страница со податоци за споредба на трошоците на живот.

Сѐ повеќе станови се издаваат за краток престој

Податоците на Катастарот покажуваат дека и покрај растот од последните две години, не може да се постигнат бројките за закупите што важеа пред значителниот раст на цените по ковид-кризата. Тогаш Агенцијата регистрирала по 500 закупи на станови годишно во однос на сега.

Освен зголемените цени на киријата, причина се и растечките цени на комуналиите. Според цените прикажани на „Нумбео“, за трисобен стан во Скопје за сметки со вклучен интернет и телефонија месечниот трошок се зголемува за околу 150 евра.

Ваквите цени ги натераа студентите и работниците од поблиските градови да се откажат од изнајмување и да патуваат секој ден до главниот град. Месечните автобуски билети до Велес, Тетово или Куманово чинат од 4.500 до 5.000 денари.

Според податоците од последниот попис во земјава, над 300.000 стана во земјава се празни, скопските општини се лидери на листата. Во Центар и во Карпош има по над 10.000 празни стана.

Во меѓувреме, сопствениците на празните станови бараат нови начини за заработка од својот имот. Сè почесто во огласите на домашните веб-страници се наоѓаат станови за изнајмување за краток престој. За туристичко или бизнис-патување во Скопје едно ноќевање најчесто чини 30 евра. Тие што огласуваат на „Букинг“ или на „Ербиенби“ издаваат поскапо, цените најчесто се движат меѓу 50 и 70 евра по ден.

Во моментов нема коментари за веста. Биди прв да коментира...

Остави коментар