Народната банка соопшти дека во јуни годинава вкупните депозити забележаа месечно зголемување од 0,4 проценти, што во целост се должи на повисоките депозити на корпоративниот сектор.
„На годишна основа, вкупните депозити забележаа раст од 7,2 проценти, како резултат на зголемените депозити на двата сектора, со значително поголем придонес на секторот ‚домаќинства‘“, информираат од НБМ.
Вкупните кредити, во јуни се зголемени на месечна и на годишна основа за 0,8 проценти и 6,4 проценти, соодветно. Промената кај двете основи произлегува од растот на кредитите на двата сектора, со поизразен придонес на кредитите на секторот „домаќинства“.
Од НБМ прецизираат дека вкупните депозити на корпоративниот сектор, во јуни, се зголемени за еден процент, споредено на месечна основа.
„Растот пред сè произлегува од зголемените депозитни пари, а во помал дел и од долгорочните депозити во странска валута, во услови на пад на краткорочните депозити и долгорочните депозити во денари“, велат од Народната банка.
На годишно ниво, депозитите на корпоративниот сектор бележат раст од 4,7 проценти, поради зголемените депозитни пари, долгорочните депозити во странска валута, како и долгорочните и краткорочните депозити во денари, во услови на пад на краткорочните депозити во странска валута.
Во јуни, кредитите на корпоративниот сектор забележаа месечен и годишен раст од 0,6 проценти и 5,8 проценти, соодветно.
„Растот според двете основи се должи на зголемените кредити во денари, при намалено кредитирање во странска валута“, велат од НБМ.
Во минатиот месец, вкупните депозити на домаќинствата, се непроменети на месечна основа. Споредено со јуни минатата година, депозитите на домаќинствата остварија раст од 8,9 проценти, којшто произлегува од повисоките депозитни пари и долгорочните депозити во денари и во странска валута, а краткорочните депозити во странска валута и во денари забележаа пад.
Кај кредитите на домаќинствата, во јуни e забележано месечно и годишно зголемување од еден процент и 7,1 проценти, соодветно, коешто во поголем дел се должи на зголеменото кредитирање во денари, при раст и на кредитите во странска валута.
Анализирано според намената на кредитите одобрени на физичките лица, во јуни 2024 година, најзастапените категории − потрошувачките и станбените кредити бележат месечен раст од 0,8 и 0,9 проценти, соодветно, при годишен раст од 5,8 и 10,2 проценти, соодветно.
„Во јуни, автомобилските кредити се зголемија за 7,5 проценти на месечно ниво, додека годишниот раст изнесува 25,3 проценти“, велат од Народната банка.
Кредитите одобрени на кредитни картички се пониски на месечна и на годишна основа за 0,3 и 8 проценти, соодветно. Овој месец, негативните салда на тековните сметки бележат месечен и годишен раст од 5,7 и 7,9 проценти, додека кредитите одобрени по други основи, во јуни, се пониски за 2 проценти на месечно ниво и 18,8 проценти на годишно ниво.
.webp){kind=icon}
