Банките се претпазливи во однос на зголемувањето на каматните стапки имајќи предвид дека драстичното и брзо зголемување може да влијае на способноста на кредитокорисниците за сервисирање на обврските, вели во интервју за МИА претседателката на Македонската банкарска асоцијација (МБА), Маја Стевкова-Штериева.
Во интервјуто, таа порачува секој кредитокорисник или депонент на средства во банка да посвети внимание на одредбите во договорот со цел да се избегнат недоразбирања или непотребна паника околу каматните стапки.
„Фиксните каматни стапки по дефиниција не се менуваат за периодот додека се фиксни и во тој случај нема потреба од вознемиреност. Но, многу е важно да се посвети внимание и да се видат одредбите во договорите“, нагласува Стевкова-Штериева.
Банкарскиот систем, потенцира таа, е стабилен и добро капитализиран, а капиталот и резервите се покажале како доволни за банките да се справат со досегашните предизвици.
МИА
Во однос на тоа дали може да се очекува зголемување на каматните стапки за граѓаните и за стопанството, претседателката на МБА се повикува на фактот дека Народната банка (НБ) на неколкупати досега ја зголемила основната каматна стапка, која сега е на висина од 1,25 процентни поени.
Според неа, неспорно е оти сигналот преку континуираното зголемување на каматната стапка од страна на НБ, ќе доведе до понатамошно зголемување и на каматните стапки на депозитните и кредитните производи на банките.
„Сепак, мора да се истакне дека висината на промената, тајмингот и банкарските производи што ќе бидат опфатени се дел од деловната политика на секоја банка и поради тоа најдобро е да се следат објавите на банките поединечно“, посочува Стевкова-Штериева.
.webp){kind=icon}
