.webp){kind=icon}
Македонија ја очекува многу тешка зима, од многу аспекти, а најмногу енергетски, изјави утрово при гостувањето во ТВ Bloomberg Adria, професорот во пензија, Константин Димитров, експерт по енергетика. Димитров е категоричен дека нема брзи решенија во овој сектор и тврди дека е загрижен за развојот на настаните.
„Јас одамна зборувам дека не чека многу тешка зима од повеќе аспекти, а најмногу енергетски. Владата прогласува кризна состојба за да може финансиски да помогне и да префрли средства кон Електрани на Северна Македонија. Ние како граѓани очекуваме од Владата добри вести и ги добиваме тие добри вести, ама не им веруваме затоа што се останува само на зборот. Ако се дејствува кога ќе дојде зима, ќе биде доцна. Во кризна состојба ќе може да се купи јаглен и гас за да функционираат енергетските постројки за да се произведува електрична енергија. Сега, резервите на јаглен на депонијата на РЕК Битола, кој е наш најголем енергетски капацитет за производство на струја, се многу мали односно за само неколку дена, а треба да се за неколку месеци. Хидропотенцијалот е доста мал. Значи сме доста загрижени, вели Димитров.
Професорот тврди дека надлежните требало да се подготват на време. Подготовката на термоелектроенегетските објекти, според него не е на ниво и затоа кога ќе влезат во погон немаат кондиција да работат.
„Македонија и во лето увезува струја и тоа до 30 отсто од потребите. Клучниот проблем е што се намали домашното производство, Владата префрла пари кон државната компанија за производство, ама ММФ вели да се зголеми цената за да граѓаните ја штедат енергијата. Стравувањата сепак постојат. Ние немаме договор за транспорт на природен гас преку Бугарија од каде единствено доаѓа во земјава, се уште немаме купено ни јаглен кој со месеци ќе треба да се транспортира, значи немаме природен гас, немаме јаглен..., додаде професорот.
Целосното интервју на линкот
