Расте бројот на туристи во земјава, до октомври ја посетиле 92.000 повеќе од лани

Годинава Македонија ја посетиле за 8,8 проценти повеќе туристи на годишно ниво. Новите податоци од Државниот завод за статистика се однесуваат на периодот од јануари до октомври и покажуваат дека во десетте месеци Македонија ја посетиле 1.138.353 туристи, односно за 92.166 туристи повеќе од истиот период лани.

Што се однесува до ноќевањата, пак, растот кај нив во проценти изнесува 5,5 отсто, а изразено во бројка во периодот од јануари до октомври годинава се реализирале 3,05 милиони ноќевања или за речиси 160.000 повеќе од лани.

Традиционално, туристите најмногу ги посетуваат главниот град и езерските места. Конкретно во октомври земјава ја посетиле 107.672 туристи, од кои нешто над 41.000 биле во Скопје, а речиси 42.000 ги посетиле езерските места. Најмногу од нив престојуваат во хотели (околу 98.000), а речиси 5.700 престојувале во куќи или станови што се издаваат за краток период. Според тоа, незначителен е бројот на туристите што престојуваат во преноќишта, бањски лекувалишта, планински домови или работнички, детски и младински одморалишта.

„Блумберг“ пишуваше за предностите и недостатоците кога станува збор за издавање станови за краток престој и целата анализа на таа тема може да ја прочитате на овој линк.

 

 

Од вкупниот број туристи во октомври, околу 80.000 се странски, а речиси 28.000 домашни. А, што се однесува на тоа кои гости ја посетиле земјава во октомври, статистичките податоци покажуваат дека најмногубројни се Турците. Речиси третина од туристите биле од Турција или 23.828 (29,8 отсто) туристи. Следни по бројност се Србите (6.582 туристи односно 8,2 отсто), Германците (4.686 туристи или 5,9 отсто) и Грците (4.624 туристи или 5,8 проценти).

Да потсетиме, официјалните статистички податоци покажуваат дека ноќевањето во Македонија за една година е поскапо за 21 отсто. И покрај тоа, овој сегмент од туризмот и угостителството бележи квантитативен раст.
Но како што претходно пишуваше „Блумберг Адрија“, угостителите не ги сметаат за релевантни бројките за странски туристи.

Имено, Аркан Керим, претседател на Туристичко-угостителската комора при Сојузот на стопански комори (ССК), во изјава за нашиот медиум рече дека официјалната статистика не ја дава реалната слика со туристите, од причина што, според него, никаде не се регистрираат како туристички кратките влезови на странците, особено од Косово и од Грција, кои во голем дел доаѓаат во казината во земјава и притоа трошат пари и во рестораните.