Раст на кредитирањето: За што најмногу се задолжуваме?

Во ноември, вкупните депозити се зголемени за 0,9 проценти на месечна основа во целост како резултат на растот на депозитите на секторот „домаќинства“, додека депозитите на корпоративниот сектор се намалија, соопшти Народната банка. Анализирано на годишно ниво, вкупните депозити забележаа раст од 11 проценти, поради повисоките депозити на двата сектора, со поголем придонес на депозитите на секторот „домаќинства“. Вкупните кредити, во ноември, се зголемени за 0,7 и 9,7 проценти на месечно и на годишно ниво, соодветно. Притоа, месечниот и годишниот раст се резултат на зголемените кредити на двата сектора, со поголем придонес кон растот на кредитите на корпоративниот сектор.

Корпоративен сектор 

Овој месец, вкупните депозити на корпоративниот сектор забележаа надолна месечна промена од 0,6 проценти. Промената произлегува од намалувањето на депозитните пари и краткорочните депозити во странска валута, во услови на остварен раст на краткорочните депозити во денари и долгорочните депозити, во денари и странска валута. Годишниот раст изнесува 7 проценти и е резултат на повисоките депозитни пари, долгорочните депозити во странска валута и долгорочните и краткорочните депозити во денари, додека краткорочните депозити во странска валута забележаа пад.

Кредитите на корпоративниот сектор во ноември, остварија месечно зголемување од 0,8 проценти коешто се должи на зголеменото кредитирање во денари и во странска валута, со поголем придонес на кредитите во денари.

„Споредено на годишна основа, растот од 11,5 проценти во целост произлегува од зголемените кредити во денари, во услови на пад на кредитите во странска валута“, информира НБМ.

Домаќинства

Во ноември, кај вкупните депозити на домаќинствата е забележан месечен и годишен раст од 1,9 и 13,3 проценти, соодветно. Притоа, растот кај двете основи во целост е резултат на зголемените депозитни пари и долгорочните депозити, додека краткорочните депозити бележат намалување.

Кредитите на домаќинствата, во ноември, се зголемени за 0,7 проценти на месечно ниво како резултат на речиси подеднаков раст на кредитите во странска валута и во денари. На годишно ниво е забележан раст од 8,2 проценти, којшто во поголем дел се должи на кредитите одобрени во денари.

Според намената на кредитите одобрени на физичките лица, во ноември, најзастапените категории − потрошувачките и станбените кредити бележат месечно зголемување од 0,7 и 1,2 проценти, соодветно, при годишен раст од 7,3 проценти и 11,6 проценти, соодветно. Овој месец, автомобилските кредити се намалија за 0,7 проценти на месечна основа, додека на годишна основа растат за 10,8 проценти. Кредитите одобрени на кредитни картички, во ноември, забележаа месечен и годишен пад од еден процент и 9,2 процент, соодветно. Во ноември, негативните салда на тековните сметки и кредитите одобрени врз други основи бележат месечно намалување од 4,7 проценти и 0,3 проценти, соодветно, при остварено годишно намалување од 4,8 и 14,3 проценти.