Вкупните депозити во македонските банки во декември достигнаа 600,3 милијарди денари (околу 9,7 милијарди евра)и раст на годишно ниво од 12,4 проценти, покажуваат новите податоци на Народната банка. Оттаму објаснуваат дека растот во поголем дел се должина зголемувањето на депозитите на „домаќинствата“, при раст и на депозитите на корпоративниот сектор. Од друга страна, состојбата на вкупните кредити во последниот месец од минатата година изнесува 494,4 милијарди денари (околу осум милијарди евра), што е годишно зголемување од 11,2 проценти.
„Месечната и годишната промена е резултат на растот на кредитирањето кај двата сектора, со поизразен придонес на корпоративниот сектор“, информираат од Народната банка.
Корпоративен сектор
Прочитај повеќе
Раст на кредитирањето: За што најмногу се задолжуваме?
Според намената на кредитите одобрени на физичките лица, во ноември, најзастапените категории − потрошувачките и станбените кредити бележат месечно зголемување од 0,7 и 1,2 проценти.
21.12.2024
Паѓаат каматите на кредитите, растат на депозитите
Просечната каматна стапка на вкупните кредити изнесува 5,38 проценти и е намалена за 0,03 п.п. и 0,11 п.п. на месечна и на годишна основа.
29.11.2024
Во декември, вкупните депозити на корпоративниот сектор се зголемени за 8,7 проценти на месечно ниво. Притоа, промената пред сè произлегува од растот на краткорочните депозити во странска валута и на депозитните пари, при помал раст и на краткорочните и на долгорочните депозити во денари, додека долгорочните депозити во странска валута остварија пад.
„Анализирано на годишна основа, овие депозити бележат раст од 9,2 проценти, којшто се должи на зголемувањето на сите компоненти, со поголемо учество на депозитните пари и на краткорочните депозити во странска валута и во денари, при раст и на долгорочните депозити во денари и во странска валута“, наведуваат од Народната банка.
Од друга страна, кредитите на корпоративниот сектор овој месец остварија месечен раст од 4,4 проценти, којшто во поголем дел е резултат на повисоките кредити во денари, при помал раст и на кредитите во странска валута.
„Годишниот раст изнесува 13,9 проценти и во целост се должи на зголеменото кредитирање во денари“, соопшти НБМ.
Домаќинства
Вкупните депозити на домаќинствата, во декември, се зголемени за 3,9 проценти на месечна основа.
„Промената пред сè е резултат на растот на депозитните пари, при дополнителен раст и на долгорочните депозити во денари и во странска валута и на краткорочните депозити во денари, додека краткорочните депозити во странска валута бележат пад“, велат од Народната банка.
На годишна основа, растот изнесува 13,8 проценти и произлегува од зголемените депозитни пари и долгорочните депозити во денари и во странска валута, при пад на краткорочните депозити во странска валута и во денари.
Во декември, кај кредитите на домаќинствата е забележан месечен раст од 1,1 процент, којшто во поголем дел произлегува од зголемените кредити во странска валута.
„Годишниот раст изнесува 8,8 проценти и се должи на растот на кредитите во денари и во странска валута, поизразен кај кредитите во денари“, посочуваат од НБМ.
Анализирано според намената на кредитите одобрени на физичките лица, кај потрошувачките и станбените кредити, како најзастапени категории, е остварен месечен раст од 1,3 и 2,3 проценти, соодветно, во услови на годишен раст од 7,5 и 12,5 проценти, соодветно. Автомобилските кредити, овој месец, се намалени за 2,9 проценти на месечно ниво, при годишен раст од 4,7 проценти. Во ноември, кредитите одобрени на кредитните картички, бележат месечен и годишен пад од 1,9 и 9,2 проценти, соодветно, додека негативните салда на тековните сметки се намалени за 13,5 и 4,4 проценти на месечна и годишна основа, соодветно. Кредитите одобрени врз други основи се зголемени за 0,2 проценти на месечна основа, при годишен пад од 12 проценти.
.webp){kind=icon}