Македонски компании урнаа историски рекорд во инвестирање во странство

Се остварија предвидувањата на „Блумберг Адрија“ дека 2024 година ќе биде запаметена по рекордниот износ вкупни странски директни инвестиции во Македонија, коишто лани достигнаа 1,25 милијарди евра. Претставници на Владата неодамна се пофалија со ова достигнување на земјата, меѓутоа се чини дека никој од надлежните не примети дека минатата година беше урнат уште еден рекорд – на директни инвестиции од Македонија во странство. Имено, според податоците на Народната банка директните инвестиции од Македонија во странство лани изнесувале 166,8 милиони евра што е убедливо највисоко ниво досега.

Најмногу инвестиции во Грција

На првото место на листата земји во кои се слеале најмногу инвестиции од Македонија е Грција, кадешто лани имало прилив инвестиции од земјава во износ од 72,9 милиони евра. Потоа следуваат Британија (14,2 милиони евра), БиХ (11,5 милиони евра), Словенија (10,1 милиони евра) и Бугарија (7,7 милиони евра).

Во какви дејности се инвестициите?

Меѓу дејностите во кои имало најмногу инвестиции од Македонија во други држави се базичните фармацевтски производи (16,1 милиони евра), градежништвото (9,18 милиони евра), услугите (6,24 милиони евра), трговијата на големо и мало (6,35 милиони евра), а доминираат инвестициите во неалоцираните економски активности              (105,8 милиони евра).

Кога станува збор за видот на инвестиции, податоците на Народната банка откриваат дека лани доминирале сопственичкиот капитал и реинвестирањето на добивката, а потоа следуваат должничките инструменти и вложувањата на директниот инвеститор во претпријатието во кое се инвестира (средства).

Кои компании инвестираат во странство?

Во изминатиов период повеќе компании од Македонија објавија дека инвестирале во странство. Од областа на градежништвото се истакнува компанијата „Адора“ која во Србија изгради хотелско-резиденцијален комплекс на Златибор, а во Грција инвестираше во реконструкција на станбено-деловна зграда лоцирана до познатата улица „Цимитски“ и солунското пристаниште, изградба на луксузни вили над плажата Криопиги на Халкидики и бутик комплекс на островот Тасос. 

Од фармацијата, една од компаниите кои се јавуваат како најголеми инвеститори во странство е „Алкалоид“. „Блумберг Адрија“ неодамна пишуваше дека „Алкалоид“ инвестира во јужнокорејската компанијата „Рофибио“ (Rophibio) преку купување малцински удел, а исто така отвори свое претставништво во Казахстан од каде што планира поголем влез на пазарот во Азија.

Од областа на малопродажбата, компанијата „Стокомак“ неодамна најави влез на пазарот во Србија, а „Кам“ веќе има свои маркети во Бугарија.

 

Во моментов нема коментари за веста. Биди прв да коментира...

Остави коментар