Дури 15.000 приговори до „ЕВН Хоум“ за високи сметки за струја за два месеци

Во „ЕВН Хоум“ во периодот декември 2024 - јануари 2025 година пристигнале 15.000 приговори за сметките за електрична енергија, од кои 15 проценти биле ревидирани според новопрочитана состојба, а за останатите било утврдено дека немале основ, бидејќи вредноста на сметката била соодветна на реалната потрошувачка.  До второстепениот орган – Регулаторната комисија за енергетика пак до 28.02.2025 пристигнале 345 приговори.

За негодувањата во јавноста во однос на високите сметки за електрична енергија во изминативе месеци денеска заеднички се огласија Министерството за енергетика, рударство и минерални суровини и Регулаторната комисија за енергетика. Во насока на поголема транспарентност и едукација оттаму ги информираат граѓаните за сите можности за точен и навремен увид на потрошената електрична енергија како и за механизмите што им стојат на располагање, базирано на строго почитување на законите што ја регулираат оваа област.

„За точно утврдување на состојбите сите граѓани кои сметаат дека имаат основ за дополнителна проверка (согласно член 37 од Законот за енергетика, правилата за снабдување со електрична енергија и правилата за постапување на приговори и разрешување на спорови), имаат право да поднесат приговор“, се наведува во соопштението.

Според законот, „ЕВН Хоме“ е должно квартално (на секои 3 месеци) да ги отчитува броилата за да се осигури дека податоците се точни. Според „ЕВН Хоум“ околу 85 проценти од броилата се отчитуваат секој месец.

„Меѓутоа има броила кои се поставени во имотот на корисниците и кои не можат да се отчитаат доколку корисникот не е присутен. 15 проценти од броилата, во кои влегуваат непристапни, во одделни рурални средини, се читаат два пати годишно. Во период од 3 месеци, процентот на отчитани броила бил над 95 проценти. За броилата што нема можност да се отчитаат во текот на месецот фактури се изготвуваат врз основа на прогнозирана потрошувачка (автоматски алгоритми), каде што основот е кривата на потрошувачка и потрошувачката во последните 12 месеци“, пишува во соопштението.

Според информациите на „ЕВН Хоум“, по воведувањето на блок тарифите се вовел механизам на проверка. За потрошувачката на корисниците кои прв пат влегуваат во четвртиот блок се појавува „системска нотификација“ и истите секогаш поединечно се проверуваат од страна на „Електродистрибуција“. Овој процес се спроведува пред да му се достави фактурата на корисникот. Во ваков случај, доколку влегувањето во четвртиот блок е последица на претходни неотчитани месечни состојби, односно нефактурирани киловат-часови, фактурата веднаш се корегира.

Доколку граѓаните се сомневаат дека нивните броила не се редовно отчитувани можат да ја споредат фактурата со вистинската состојба на броилото – доколку има неусогласеност, ЕВН е должно да реагира. Тие можат сами да пријават состојба со отчитување на броилото или да поднесат барање до „ЕВН Хоме“ за физичко отчитување на броилото и проверка на блоковите, доколку не се во можност сами да го отчитаат броилото. Исто така, можат да побараат доказ за отчитување: според законот, ЕВН мора да обезбеди потврда за кварталното отчитување и доколку ја нема, потрошувачот имате право на ревизија.

Од РКЕ и Министерството препорачуваат да се следат блоковите со оглед на тоа што цената на струјата е поделена во четири блокови и колку повеќе се троши, толку е повисока тарифата. Дневното препорачано ограничување е до 7 kWh (прв блок).

„Ако забележите дека сте близу до горната граница на блокот, намалете ја потрошувачката во следниот период. Со редовна контрола можете да ги намалите ризиците.

Во анализите направени од РКЕ, констатирано е дека дел од потрошувачите се нашле во повисоки тарифни блокови поради методологијата на пресметка. Универзалниот снабдувач има обврска да направи ревизија на ваквите случаи и, доколку е потребно, да изврши корекција“, се наведува во соопштението.

Од Министерството и РКЕ велат дека непрекинато ги следат сите постапки и инсистираат на целосна транспарентност од страна на сите инволвирани страни.

„Како дополнителна мерка, во тек се активности за активирање на современа апаратура за проверка на броилата во Бирото за метрологија со што ќе се овозможи дополнителна независна верификација и проверка на броилата, по жалба на потрошувачите, во државна институција. Ова ќе придонесе за дополнителна транспарентност, правичност и контрола“, се вели во соопштението.

Во моментов нема коментари за веста. Биди прв да коментира...

Остави коментар