Гаража во скопски Центар чини колку стан во внатрешноста

Градежната експанзија, особено во центарот на градовите, го направи паркирањето најлошо искуство. Од друга страна, граѓаните што поседуваат паркинг-места или гаражи добија можност да развијат плоден бизнис. Огласите за продажба на гаражи и места за паркирање, особено во центарот на Скопје, достигнуваат суми со кои во помалите места може да се купи пристоен стан.

На пример, во еден оглас за продажба на гаража за три возила во Дебар Маало се бараат 50.000 евра. Во Аеродром, кај поликлиниката „Јане Сандански“, на продажба е гаража од 17 квадратни метри, со две врати, струја и вода за 25.000 евра. За 20.000 евра може да се купи гаража со истата површина кај Зелен пазар. Оваа гаража може и да се изнајмува за 10.000 денари месечно.

Малку подолу, кај Управата за јавни приходи, се продава гаража од 15 квадратни метри, во добра состојба, за 15.000 евра. За таа сума се продава и гаража кај ПИОМ. А најчестите суми што ги видовме во огласите се 12.000 евра за подземја и околу 8.000 евра за паркинг-место на земја.

И во издавањето има пари. Паркинг-место, според огласите, за месечно изнајмување чини од 1.000 денари за периферијата на градот, па до 150 евра во елитните локации. Најчестата сума што ја бараат сопствениците во центарот на Скопје е од 50 до 100 евра.

За гаража 23.000 евра - просек во август 2024 година

Лани во трговијата со гаражни места во земјава се свртеле над 4,6 милиони евра. Според податоците на Агенцијата за катастар на недвижности, во текот на 2024 година биле продадени 687 гаражи.

Рекордот бил поставен во август, кога за 50 гаражи биле потрошени 1.150.017 евра или во просек - 23.000 евра за една гаража.

Трендот на раст на цените на недвижностите во земјава се пресликува и на гаражите. Во 2023 година за 708 гаражи биле потрошени четири милиони евра.

Кај закупите на гаражите, според катастарската евиденција, има намалување на вредноста. Имено, лани биле склучени договори во вредност од 5.191 евро за 77 гаражи. Во годините пред тоа биле евидентирани по педесетина закупи за сума од околу 7.000 евра.

Гаража во Белград и над 70.000 евра

Цените на гаражите во последните години значително пораснаа и во Белград. Според податоците на Републичкиот геодетски завод што ги објави српската редакција на „Блумберг Адрија“, во првата половина од 2024 година цените на гаражните места во Србија се движеле од 400 евра во Ниш до 73.000 евра на територијата на белградската општина Врачар.

Растат и цените за изнајмување. До пред неколку години цените за закуп на гаражи и паркинг-места во центарот на Белград се движеле меѓу 70 и 100 евра, а сега изнесуваат од околу 150 до 200 евра месечно.

Во моментов нема коментари за веста. Биди прв да коментира...

Остави коментар