Државата во обид да ја нормализира цената на становите

Со одлуката за намалување на цената на комерцијални станови што ги гради државата во Битола, владата влегува во процес за нормализација на цените на становите на пазарот.

Во наредниот период поевтин квадрат ќе биде понуден и во Охрид и Скопје, најави вицепремиерот и министер за транспорт Александар Николоски кој денеска присуствуваше на доделувањето на социјални станови во општина Кочани.

„Во следниот период ќе работиме на реализација на комерцијални станови. Јавноста е запозната со одлуката на Владата, комерцијалната зграда којашто се гради во општина Битола да биде понудена на продажба по цени коишто се би рекол реални, а тоа е 1000 евра за м2 за станбена површина, 500 евра м2 за гаража и деловните простории по 2000 евра за м2, како би можело да се влијае на енормно високите цени на пазарот за недвижности, пред сè во неколку големи општини. Следни вакви комерцијални станови ќе се градат во Охрид а ваков повик потоа ќе имаме и во Скопје бидејќи многу млади брачни парови не можат да си дозволат да плаќаат по 2000-2500 евра за станбен квадрат“, изјави вицепремиерот Николоски.

Денеска во Кочани, вицепремиерот Николоски заедно со претседателот на Владата Христијан Мицкоски и директорот на ЈП за станбен и деловен простор Марјан Стефановски, беа присутни на доделување на социјалните станови на семејствата кои ги исполнуваа условите согласно јавниот повик.

„Завршена е процедурата во соработка со министерството за транспорт за распределба на социјални станови за ранливи категории на граѓани и во Кочани и во Велес. Се работи за категории на граѓани кои навистина имаат потреба од овие станови“, истакна Николоски.

Тој додаде дека инвестицијата за социјалната зграда изнесува 72 милиони денари и дека се работи на изградба на вакви станови и во Прилеп, Македонска Каменица и Бутел во Скопје.