Претседателката Гордана Силјановска Давкова денеска ќе го соопшти својот предлог за гувернер на Народната банка. Мандатот на актуелната гувернерка Анита Ангеловска Бежоска истекува денеска, а седница за изборот на новиот гувернер треба да се одржи утре.
Претседателката вчера имала состаноци со сите кандидати за позицијата, а во јавноста најмногу се спомнуваат имињата на сегашната гувернерка, и на поранешните министри за финансии Зоран Ставрески и Трајко Славески и двајцата од владејачката партија ВМРО ДПМНЕ. Кој и да седне на чело на монетарната власт, експертите велат дека ќе мора да продолжи да води прудентна политика.
Добро утро, ова се петте вести што се важни за почеток на денот.
Со 100.000 евра поддршка, Владата ќе ги враќа младите брачни парови в село
Владата ќе ги стимулира младите кои ги напуштиле селата да се вратат дома. При тоа ќе им понуди и финансиска поддршка од 100.000 евра. Идејата не е нова. Пред десетина години сличен проект имаше тогашниот премиер Никола Груевски, но сега финансирањето на тие што ќе се вратат в село влегува во закон.
Новиот закон за земјоделство и рурален развој е достапен за јавен увид. Увидот ќе трае до 28 мај, а на 2 јуни е предвидено да се одржи јавна расправа. Тој треба да обезбеди усогласување со европските директиви во делот на директните плаќања и уредувањето на земјоделските пазари. Главната цел на законот е заживување на руралните средини и стимулирање на земјоделците да се здружуваат за да станат поконкурентни.
Македонскиот стартап екосистем на 78. место во светот, како се рангирани земјите од регионот?
Македонија се најде на 78. место на листата од 100 земји во светот рангирани во извештајот Глобалниот стартап-екосистем индекс за 2025 година, што е пад за едно место во однос на претходната година.
Од земјите од регионот Адрија, подобри од нас се Хрватска (на 50. место), Србија (на 56. место) и Словенија (на 57. место), а полошо е рангирана само Босна и Херцеговина (на 91. место), иако таа единствената земја што има подобар пласман, а сите останати бележат пад во однос на минатогодишната листа. На првите три места, како и во претходната година, се најдоа Соединетите Американски Држави, Велика Британија и Израел.
Трамп го вовлекува новиот папа во незгодна улога во војната со Русија
Предложената улога на папата Лав XIV како домаќин на мировните преговори меѓу Украина и Русија во Ватикан претставува значаен развој на настаните за првиот папа роден во САД, и тоа токму кога администрацијата на Трамп се чини дека се повлекува од водењето на преговорите.
Во минатото Ватикан помогна во арбитрирањето на деликатните прашања од дипломатијата. Но, ова ризикува да го вовлече папата, кој застана на чело на верската заедница пред помалку од две недели, во нерешлив конфликт чиј крај не е на повидок.
„Фајзер“ лиценцира кинески лек против рак за рекордни 1,2 милијарди долари
„Фајзер“ (Pfizer) однапред ќе плати 1,25 милијарди долари за да лиценцира експериментален лек против рак од Кина, во договор што го нагласува растечкиот ентузијазам на мултинационалните производители на лекови за кинеските биотехнолошки иновации.
Според соопштението за медиумите, договорот му дава права на „Фајзер“ да развива и комерцијализира лек од компанијата „3 ес-био“ (3SBio Inc.), со седиште во Шенјанг, кој моментално е во фаза на клиничко тестирање за повеќе типови тумори. Покрај авансното плаќање - што поставува нов рекорд за договори за лиценцирање во Кина - „3 ес-био“ има право на надоместоци до 4,8 милијарди долари за натамошно производство.
Маврициус сака да ги привлече богаташите и да ја смени репутацијата на даночен рај
Маврициус се појавува како еден од најбрзорастечките пазари на богатство во светот, со прогноза за двојно зголемување на неговата милионерска популација до 2033 година. Сега островската нација работи на искористување на бумот и отстранување на својата репутација како даночен рај.
Новата влада, која е на власт од ноември, им се додворува на семејните компании, менаџерите за богатство и финтек-фирмите во обид да ја диверзифицира економијата од 14,6 милијарди долари надвор од туризмот и недвижностите.
.webp){kind=icon}
