Инстант среќа: Лани сме оставиле над 200 милиони евра во обложувачници

Македонските граѓани лани оставиле над 209 милиони евра (12,858,584,788.00 денари) во спортските обложувачници. Податоците што ги побара „Блумберг Адрија“ од Управата за јавни приходи покажуваат дека просечната уплата по тикет лани изнесувала 269 денари.

Ако бројките од УЈП се споредат со податоците за буџетските приходи лани, се гледа дека во обложувачниците биле уплатени толку пари колку што државата во текот на целата година собрала по основ на увозни давачки.

Спортските обложувачници лани исплатиле добивки во вредност од 169 милиони евра (10,387,112,009.00 денари) или 40 милиони евра помалку од сумата што ја собрале при уплата. Најголемата исплатена добивка лани изнесувала близу 68 илјади евра (4,175,581.00 денари).

Ќарот на државата само по основ на данок на личен доход изнесувал над 20 милиони евра (1,250,518,828.00 денари), колку што УЈП наплатила по основ на овој данок од исплата на добивки кај спортските обложувачници.

Државата во битка со нелегалното обложување

Поголем проблем е нелегалното онлајн обложување. Во текот на јули министерот за дигитална трансформација Стефан Андоновски го потпиша третиот налог за забрана на нови 42 нелегални онлајн игри на среќа.

Во текот на годинава се затворени вкупно 268 нелегални страници за онлајн игри на среќа.

„Тука не запираме, ќе продолжиме и понатаму. Ова е наше ветување, кое станува реалност! Ова е борба против пандемијата на нелегални приредувачи на игри на среќа, кои крадат од нашите граѓани, од најмладите, од незаштитените. Затоа, повторно ги повикувам нашите сограѓани да ги повлечат средствата што ги имаат депонирано на вакви страници за игри на среќа“, порача министерот Андоновски.

Според Андоновски, новиот Закон за игри на среќа дополнително ќе се справува со сè поприсутното рекламирање и лажното претставување на приредувачите на игри на среќа.

Нов закон и за легалните приредувачи на игри на среќа

Тој закон беше на седница на Владата на 15 јули и е условно усвоен. Тоа значи дека е пратен на доработка за усогласување со министерствата за здравство, дигитална трансформација, правда, УЈП, Акционерското друштво за приредување игри на среќа и Државната лотарија.

Законот предвидува дислоцирање на објектите за игри на среќа што се наоѓаат во близината на училиштата. Потребната оддалеченост на обложувачниците и слични објекти од образовните институции ќе треба да изнесува најмалку 500 метри. Истовремено, законот зголемува дел од давачките што треба да ги плаќаат организаторите на игри на среќа.

АСОМ: Законот нема да го реши проблемот, напротив

Асоцијацијата на спортски обложувачници на Македонија (АСОМ) најостро реагира на предлог-законот за игрите на среќа и за забавните игри. Оттаму сметаат дека власта „предизборно калкулира и за евтини политички поени во своите математики ја вклучи и индустријата за игри на среќа, која е најрегулираната гранка во државата“.

„Со овој предлог-закон се загрозуваат над 10.000 директни работни места и повеќе од 50.000 индиректни во индустриите поврзани со игрите на среќа, а државниот буџет ќе изгуби повеќе од 280 милиони евра годишно. Ова ќе значи уништување на целата легална индустрија заради краткорочни политички поени пред избори“, наведуваат од АСОМ.

Асоцијацијата уште додава дека законот ќе овозможи легалната индустрија да се претвори во нелегална, како што беше во 1990-тите.

И најмладите бараат инстант заработка

Здружението „ХОПС – Опции за здрав живот’ од Скопје минатото лето спроведе истражување меѓу младите луѓе во врска со нивните навики за обложување и за коцкање.

Во истражувањето учествуваа 214 испитаници до 25 години, од кои 71 отсто одговориле дека играле игри на среќа во казино, во автомат-клуб, онлајн или во спортска обложувачница. Од нив, најголемиот дел − 66 (30,8 отсто) играле неколкупати во годината, а 18,3 отсто играле секој ден, односно четири-пет пати во неделата.

Во однос на местото каде што младите играат игри на среќа, истражувањето покажува дека најчесто тоа е казино (26,2 отсто од вкупниот број на испитаници) и во спортска обложувачница (23,8 отсто).

Дури 17,8 отсто од играчите се изјасниле како зависни од игри на среќа.