Новиот закон за игри на среќа ќе придонесе за раст на сивата економијата и во овој сектор, предупредуваат од Здружението на вработени во секторот игри на среќа „Сакам да работам“.
Нивната реакција доаѓа откако предлагачот на Законот за приредување на игри на среќа, Министертсвто за финансии, побара да забрза собраниската постапка за носење на регулативата која забранува постоење вакви објекти во близина на училиштата. Тие мора да бидат оддалечени од образовните институцуии барем 500 метри.
„Ова е предлог за целосно затворање на објектите за игри на среќа, губење на нашите работни места со драматични последици по целата македонската економија. Заблуда е дека постои решение ем да се дислоцираат 500 метри, ем да продолжат објектите за игри на среќа да работат. Заради постоечката урбанистичка поставеност и планирање, овој услов е невозможно да се исполни. Дислоцирањето на 500 метри од една значи дека истиот објект ќе биде поставен на помалку од 500 метри од друга образовна институција“, стои во реакцијата.
Од Министертсвото за финансии објаснуваат дека освен што објектите во кои се приредуваат игри на среќа и забавни игри треба да бидат најмалку 500 метри од образовни институции, новото законско решение предвидува и подигнување на критериумите и условите за добивање лиценца и значително зголемување на давачките за приредувачите на игри на среќа и забавни игри.
„Со цел да се оневозможи лесниот пристап на малолетните лица со Законот се предлага и воведување ограничување на бројот на уплатно-исплатни места на обложувалниците, како и ограничување на бројот на деловните простории на автомат клубовите што се отвораат со една издадена лиценца, како и воведување надомест за секое ново уплатно-исплатно место, односно деловна просторија за автомат клуб. Оттука, апелираме до законодавната власт за побрзо донесување на ова законско решение, но од друга страна апелираме и до приредувачите на игри на среќа и забавни игри да не поднесуваат барање за отварање уплатно-исплатни места на игри на среќа во близина на образовни институции, затоа што со донесувањето на новото законско решение истите ќе треба да се затворат“, посочуваат од Министерството за финансии.
Здружението на вработени во овој сектор потсетува дека само вчера државата морала да се задолжи со 250 милиони евра, кои треба да ги вратат граѓаните за 18 месеци, и тоа со камата.
„Додека целата економија е во неизвесност од драматичното зголемување на цените на струјата и енергенсите низ цела Европа, кога многу домашни компании се прашуваат дали ќе треба да стават клуч и да ги отпуштат вработените, некој буквално си игра со судбината на една сериозна економска дејност која вработува 10 илјади луѓе, индиректно помага меѓу 54 до 100 илјади други работни места, секоја година придонесува со најмалку 280 милиони евра во државниот Буџет“, реагираат од Здружението.
.webp){kind=icon}
Во моментов нема коментари за веста. Биди прв да коментира...